«Украинаның егемен ел болуын қамтамасыз етуіміз керек»: НАТО-ның бас хатшысы ауысты

НАТО-ның жаңа бас хатшысы болып Нидерландтың бұрынғы премьер-министрі Марк Рютте тағайындалды. Бас хатшы қызметін тапсыру рәсімі бүгін Брюссельде, альянстың штаб-пәтерінде өтті, деп хабарлайды Orda.kz.

Рюттенің НАТО-ның бас хатшысы болып Йенс Столтенбергтің орнына келетіні туралы хабар осы жазда белгілі болған еді. Столтенберг бас хатшы ретіндегі соңғы халықаралық шара ретінде БҰҰ Бас Ассамблеясына қатысқан болатын.

«Альянстан құбылмалы көңіл күймен кетіп бара жатқанымды мойындауым керек. Уақыт келді. Орныма тамаша ізбасар келеді, бірақ мен он жыл қызмет еткен альянс пен ұйымнан кету қиын», — деді Столтенберг бас хатшының салтанатты рәсімінде. 

Өз кезегінде Марк Рютте альянстың беріктігін сақтап қалу үшін бар күшін салатынын айтты. Сондай-ақ, ол өз сөзінде Украинаны да атап өтті.

«Украинаның егемен, тәуелсіз және демократиялық мемлекет болып қалуын қамтамасыз етуіміз керек», — деді НАТО-ның жаңа бас хатшысы.