ҰҚК статистикасында парақорлық көш бастап тұр

Қазақстанда маусым айында 125 сыбайлас жемқорлық қылмысы тіркелді. Ұлттық қауіпсіздік комитетінің мәліметінше, құқық бұзушылықтардың басым бөлігі парақорлыққа қатысты. Мұндай 97 дерек анықталған, деп хабарлайды Orda.kz.       

Қазіргі уақытта жүргізіліп жатқан тергеулер аясында 67 адам күдікті деп танылды. Бір ай ішінде тергеушілер 149 қылмыстық істі аяқтап, оның 129-ын сотқа жолдады.

Парақорлықтан бөлек, істерде алаяқтық, ұрлық, қызметтік жалғандық жасау және лауазымдық өкілеттіктерді теріс пайдалану фактілері де бар.

Аяқталған істер бойынша мемлекетке келтірілген жалпы шығын көлемі 4,7 млрд теңге деп бағаланып отыр. Қазіргі уақытқа дейін бюджетке 2,1 млрд теңге қайтарылды. Бұдан бөлек, жедел қызметкерлер жалпы құны 971 млн теңгеден асатын күдіктілердің мүлкіне тыйым салды.

Қазақстанда жемқорлық тәуекелі жоғары салаларға  дәстүрлі түрде мемлекеттік сатып алу жүйесі,құрылыс және жер қатынастары, білім беру және денсаулық сақтау салалары, құқық қорғау органдары кіреді. Себебі бұл салаларда қаржы айналымы жоғары және шешім қабылдау деңгейі орталықтандырылған болғандықтан, сыбайлас жемқорлыққа бейімділік артады.

Қазақстанда сыбайлас жемқорлықпен күрес бағытында бірқатар реформалар жүзеге асырылды. Мысалы, арнайы уәкілетті органдардың құрылды. Мемлекеттік қызметтердің көбісі цифрландыруға көшті, «ашық үкімет» қағидаларын енгізілді, декларациялау жүйесінің кезең-кезеңімен енгізіліп жатыр. Сонда да жемқорлық деңгейі дес берер емес.

Оқи отырыңыз:

• Цифрлық дамуға көшсе де еліміздегі жемқорлық деңгейі дес берер емес
• Канада Украинаға 900 миллион доллар көлемінде жаңа қолдау пакетін жариялады