Түрмедегі Жыланбаев тағы аштық жариялады

Түрмеде отырған  марафоншы, белсенді Марат Жыланбаевтың тағы аштық жариялағаны белгілі болды, деп хабарлайды Orda.kz.

Бұл туралы белсендінің адвокаты хабарлады. 18 қарашада Марат Жыланбаев пен адвокаты Мейіржан Досқараев кездескен. Адвокаттың айтуынша, марафоншы соттың өзіне қатысты шыққан шешіміне наразылық білдіріп, 13 қарашада мерзімсіз аштық акциясын бастаған.

Сонымен қатар Жыланбаев түрмедегі санитарлық жағдайдың нашарлығын, тамақ дұрыс берілмейтінін және адвокаты мен достарына қоңырау шалуға мүмкіндік берілмейтінін атап өткен. 

Ақмола облысы бойынша Қылмыстық атқару жүйесі департаменті №4 мекемесі бұл жағдайға түсініктеме бермеді. 

Марафоншы Марат Жыланбаев бұған дейін де аштық жариялап, адам құқығы бұзылып жатқанын мәлімдеген еді. 

Марат Жыланбаев еліміздің түрмелеріндегі өмірдің шынайы көрінісін көрсетті. Orda.kz оның жолдаған хатын ықшамдап назарларыңызға ұсынады.