«Түрмедегі жұмбақ өлім»: Қылмыстық атқару комитеті Orda.kz сауалына жауап берді

Orda.kz редакциясы Өскемендегі №73 мекемеде жазасын өтеп жатып, жақында ғана өзіне қол салған Мерген Иманқұловқа қатысты ҚР Ішкі істер министрлігі Қылмыстық-атқару жүйесі комитетіне төрт сұрақпен ресми хат жолдады.

ҚАЖК төрт сауалға төрт сөйлеммен қысқа жауап қайтарды. Бұл жауап бұған дейін жіберген жауаптарына ұқсас.

Orda.kz бұған дейін марқұмның әйелі күйеуінің денесінен зорлық-зомбылық белгілерін көргенін жазған болатын. Ал комитеттің жауабында зорлық-зомбылық белгілері табылмағаны туралы айтылған. 

«Қазіргі уақытта бұл оқиғаның барлық мән-жайын тексеру бойынша қызметтік тексеру жүргізіліп жатыр, бұл процесс департамент басшылығының ерекше бақылауында. Тексеру аяқталғаннан кейін мұндай жағдайлардың алдын алу шаралары қабылданады», деді ҚАЖК қысқа қайырып.

Марқұмның жұбайы Эльвира Иманқұлова Абай облысы мекемелерінде қылмыстық жазаның орындалу заңдылығын қадағалау жөніндегі маманданған прокурор Пичугин Константиннің, тергеу изоляторында істейтін Жарас Асылбековтің және Абай облысы прокурорларының үстінен арыз жазғанын айтты. Алайда оның арызын Сыбайлас жемқорлыққа қарсы агенттікке жібергелі жатыр екен.

Orda.kz редакциясы бұл жағдайды өз назарында ұстайды.