Түркістанда «Шәмші әндері» фестивалі аншлагпен өтті

Түркістан қаласындағы «Керуен-Сарай» туристік кешенінде қазақ музыкасының көрнекті өкілі, «қазақ вальсінің королі», Қазақстанның халық әртісі Шәмші Қалдаяқов шығармашылығына арналған «Шәмші әндері» өнер фестивалі өтті, деп хабарлайды Orda.kz.       

Фестивальдің негізгі мақсаты – композитордың бай музыкалық мұрасын кеңінен насихаттау, ұлттық өнерді дәріптеу және жас орындаушылардың шығармашылық әлеуетін қолдау.

Іс-шараға Нұралхан Көшеров, зиялы қауым өкілдері, мәдениет және өнер қайраткерлері, өңір тұрғындары мен қала қонақтары қатысты. Фестиваль аясында Қазақстанның танымал эстрада жұлдыздары мен жас орындаушылары Шәмші әндерін орындады. Концерттік бағдарламада «Жігіттер» квартеті, Melomen, «Сарын» және Turan Boys топтары, сондай-ақ Мөлдір Әуелбекова, Маржан Арапбаева, Алтынай Жорабаева, Досымжан Таңатаров, Әли Оқапов, Ғазизхан Шекербеков, Асқар Жүнісбеков, Қанай, Руслан Ақынбаев, Аяжан Нұрмаханбет, Маржан Ерланқызы, Данияр Барыс, Эльвира Мамытова және басқа да өнерпаздар өнер көрсетті.

Шара барысында қазақ ән өнерінің алтын қорына енген Шәмші Қалдаяқовтың таңдаулы туындылары орындалып, көрермендерге ерекше рухани әсер сыйлады. Фестиваль композитор мұрасын насихаттау, ұлттық мәдениетті дәріптеу және отандық эстрада өнеріндегі сабақтастықты дамытуға бағытталған маңызды мәдени жоба ретінде жоғары деңгейде ұйымдастырылды.

Ән фестивалі түркістандықтар мен қала қонақтарына ерекше шабыт пен көтеріңкі көңіл-күй сыйлады. Көпшілік әншілермен бірге Шәмші әндерін қосыла айтып, композитор рухына тағзым етті.

Өңірде мәдениет пен туризмді дамытуға ерекше көңіл бөлінуде. 2018 жылы облыс құрылғаннан бері 35 мәдениет үйі ашылды. Түркістанда тұрақты түрде республикалық және халықаралық деңгейдегі өнер кештері мен байқаулар өткізіліп келеді.

Соңғы сегіз жылда өңірге 2,5 млн турист келген, бұл 2018 жылмен салыстырғанда 2,5 есе көп (2018 ж. – 186,2 мың турист, 2025 ж. – 500 мың). Ал тарихи нысандарды бір күндік келушілер саны 10 миллионнан асты.

Оқи отырыңыз:

• «Вальс королінің туғанына 95 жыл»: Шәмші Қалдаяқовтың ән-ғұмыры
• Ұлттық ұлан сарбаздары Абайдың 50 өлеңін жатқа айтып, жұртты сүйсіндірді
• Қатты ыстықтан Қазақстанның үш облысындағы жол бұзылды