Түркістанда араб тіліндегі ең көне қолжазба табылды

Сауран ауданында Қожа Ахмет Ясауи хикметінің ежелгі кітабы табылды. Ғалымдар кітаптың 1834 жылы жазылғанын анықтады. Қазір бұл Қазақстандағы ең көне қолжазба, деп хабарлайды Orda.kz Түркістан облысы әкімдігіне сілтеме жасап.

 Құнды жәдігер «Әзірет Сұлтан» ұлттық тарихи-мәдени мұражайына берілді.

 «Бұл Сауран қаласының тұрғыны, ақсақал Еркін Сапаровтың бастамасымен болды. Бірнеше көне кітап оның туысы Әлімжан Рамазанұлының үйінде ата-бабаларының мұрасы ретінде сақталған. Жалпы алғанда 17 қолжазба мен сирек кездесетін кітаптар алынды», - деді «Ясауитану» ғылыми орталығының жетекшісі Сайпулла Моллақанағатұлы. 

Сирек кездесетін кітаптардың бірі Ясауи хикметінің жинағы болып шықты. Кітап шағатай дәстүрінде араб-парсы тілдерінде жазылған.

«Басылым 120 хикметтен тұрады, оның 39-ы бұрын белгілі болмаған. Қолжазбаның мұқабасы мөрмен безендірілген, ал беттері қалың қағаздан жасалған», - деді ғалым. 

Қазір «Ясауитану» орталығында Қожа Ахмет Ясауидің өмірі мен мұрасы туралы 25 көне кітап, 30 дана «Дивани Хикмет» және басқа да материалдар сақталуда.

Былтыр қолжазбалар мен сирек кітаптар ұлттық орталығы «Мұрағат 2025» жобасы аясында Ресей Ұлттық кітапханасынан табылған құнды тарихи қолжазбаның көшірмесін таныстырды.

Еске салсақ,  Мұхтар Мағауиннің Силвер-Спринг қаласындағы үйі алдағы 3 жылда рухани орталыққа айналмақ.