Түркістанда 19 жастағы жігітке 14 рет пышақ сұққан әскери адамға іс қозғалды

20 ақпанда Сарыағаштағы үйінен шыққан 19 жастағы Жасұлан атты жігіт сол күйі үйіне оралмады. Ата-анасы мен туыстары бүкіл қаланы шарлап іздеген. Араға екі күн салып, мал соңында жүрген шопан бір қырдан баласының жансыз денесін тауып алған. Марқұмның анасы айыпталушылардың сол өңірден екенін айтты, деп хабарлайды Orda.kz.

Анасының сөзіне қарасақ, сол өңірдің жігіттері марқұмның атынан несие рәсімдеп, артынша өздерінен ақшаны беруді талап еткен марқұмды өлтіріп кеткен.

«Қаскөй сырттан келген жоқ. Олар – өз ауылымыздың жігіттері. Бірнеше ай бойы ұлымның атынан несие рәсімдеп, қарызды қайтармаған. Жасұлан қарызды қайтаруды талап еткенде, олар керісінше, одан құтылмақ болды. Ұлымызды адам аяғы баспайтын жерге апарып, 14 рет пышақ салған. Негізгі күдікті – әскери қызметкер», – дейді қара жамылған ана. 

Қазір Сарыағаш аудандық сотында бұл қылмыстық іс қаралып жатыр.

Айыпталушылар орындығында – үш адам отыр. Соның бірі – ефрейтор (әскери адам). Оған «аса қатыгездікпен кісі өлтірді» деген ауыр айып тағылған. Қалған екеуі – оның жақындары, олар қылмысты жасыруға көмектесті деп айыпталды.

«Айыптау актісінде жазылған. Ефрейтор ұлымды қуып жүріп, пышақ сұққан. Алдымен ішінен ұрыпты. Жасұлан қашуға тырысқанымен, артынан қалмай, бірнеше рет пышақтаған. Сол кезде көлікте бірге болған жігіт бәрін көріп отырып, үндемей қалған. Ефрейтор оны да өлтіремін деп қорқытқан көрінеді. Енді сотта екеуі кінәні бір-біріне ысырып отыр. Үшінші күдікті – сол ефрейтордың сүйіктісі», – дейді Жасұланның анасы.

Жасұлан – төрт баланың кенжесі еді. 19 жастағы бозбаланың екінші топтағы мүгедектігі болған. Сегізінші сыныпта басындағы ісікті алдырған. Ауыр дерттен айығып, өз ісін ашуды армандаған.