Түркістан облысында қорланды деген 6 жасар қыздың анасы әділдік іздейді

27 наурыз 2026 10:50 Редакция

Фото: Orda.kz

Түркістан облысында қорланды деген 6 жасар қыздың ата-анасы әділдік іздейді. Сөздерінше 1-сынып оқушысына бір мектепте оқитын жоғары сынып оқушысы азғындық жасаған. Осыны айтып дабыл қаққанымен қимылдаған ешкім жоқ дейді ашынған ата-ана. Orda.kz тілшісі қыздың анасымен тілдесіп қайтты.

Оқиға 16 ақпанда болған. 1-сынып оқушысы сабақтан күндегі келетін уақытынан әлдеқайда кешігіпті. Бұған уайымдай бастаған ана перзентінің үйге келгендегі түрінен тіпті шошып кеттім дейді. Анасына жылап келген қыздың киімі алқам-салқам болып, буылған шашы жұлмаланып кетіпті. Сөйтсе қос құрбыға жол бойында 9-сынып оқушысы тиісіп, екіншісі қашып, біреуі қаскөйдің қолында қалып қойған дейді анасы.

«Сол оқиғадан кейін қызымды алып, Түркістан қаласындағы гинекологқа көрсеттік. Ол жерде дәрігер әрекет жасалған, бірақ қыздығы аман деді. Біз оған да шүкір дедік. Енді соны солай жазып беріңіз десек, біз эксперттердің тірлігіне араласа алмаймыз деді. Сол жерде 102 шақырып, қылмыстық іс қозғаттық», – дейді жәбірленушінің анасы.

@ordaqazaqs
Отырар ауданында бірінші сынып оқушысының анасы қызына 9-сынып оқушысы азғындық жасады деп шағымданды. Оқиға ақпан айында болған. Мектептен киімі алқам-салқам болып, жылап келген қызды дәрігерге қаратқанда, зорлық әрекеті жасалғаны айтылған. Алайда ресми сот-медициналық сараптама ешқандай дене жарақаты жоқ деген қорытынды шығарған. Анасының айтуынша, тергеу мүлдем жүрмей жатыр, ал күдікті ауылда емін-еркін жүр. Оның үстіне, мектеп басшылығы психологиялық ауыр соққы алған баланы сабаққа баруға мәжбүрлеген. Түнде шошып оянатын қыз әлі өзіне келе алмай отыр. Полиция сотқа дейінгі тергеу басталғанын, бірақ әзірге заңсыз әрекет анықталмағанын мәлімдеді. Ашынған ата-ана бұл іске ішкі істер министрлігі мен балалар омбудсменінің араласуын сұрайды.
♬ оригинальный звук - ORDA - ORDA

Арада ай өтсе де қызға қол жүгіртті деген бозбала сол күйі жауапқа тартылмады дейді анасы. Сөзінше мектеп басшылығы көп ұзамай қыздың сабаққа келуін талап еткен. Психологиялық соққы алған балақай үлкендердің мәжбүрлеуімен мектепке оралды дейді отбасы. Бірақ көрген қорлығын сол күйі ұмытпаған.

«Қазір қызым күндіз бала болып ойы бөлінгенімен бұрынғыдай тамақ ішіп, ойнай алмайды. Жасық, тұйық болып қалған. Ал, түн батса тіпті ұйқы жоқ. Шошып шығады. Жанынан кетпеуімді сұрап, бір баланың келе жатқанын айтады», – дейді жәбірленушінің анасы.

Отырар ауданындағы аядай ғана ауылда тұратын отбасы қазір үреймен өмір сүруде. Өйткені қызымызға тиісті деген ер бала ештеңе болмағандай мектепте емін-еркін жүр дейді.

«Арыз тастағалы бері ешқандай іс жүріп жатқан жоқ. Біз өзіміз хабарластық екінші күні тергеушіге. Сараптама тағайындаймын дегенің кәні десек, мал ұрлығы болып жатыр еді. Қолым тимей жатыр деп біздің істі екінші күні-ақ қолға алғысы келмей отыр ғой. Әділдік болады деп осы уақытқа дейін күттік. Жоқ істің бәрі бұрмаланып жатыр. Ешқандай қамалған жоқ ол бала. Емін еркін-ауылда жүр»,– дейді жәбірленушінің анасы.

Сот медициналық сараптамасы қызға ешқандай зақым келмегенін мәлімдеген. Ал полиция департаменті тергеу жүріп жатқанын айтады.

«Аталған факті бойынша сотқа дейінгі тергеу амалдары жүргізіліп, Түркістан облысы тұрғынының барлық уәждері тексерілуде. Бастапқы тергеу іс-шараларының нәтижелері бойынша кәмелетке толмаған қызға қатысты құқыққа қайшы іс-әрекеттер анықталмады. Сонымен қатар сотқа дейінгі тергеп-тексеру жалғасуда. Оның қорытындысы бойынша қолданыстағы заңнамаға сәйкес процестік шешім қабылданатын болады»

Ашынған ата-ана бұл іске Түркістан облысының балалар омбудсмені араласып, ішкі істер министрлігі тексеріс жасауын сұрайды.

Авторы: Назерке Еркінбекқызы, Түркістан облысы

Оқи отырыңыз:

Жаңалықтар

барлық жаңалықтар