Түркістан филармониясындағы харрасмент жайлы дау: Әнші басшысымен татуласты

Бұған дейін бірнеше республикалық және халықаралық терме-ән байқауларының лауреаты, әнші Наркенже Серікбаева Шәмші Қалдаяқов атындағы Түркістан облыстық филармониясында көрген қысымы туралы айтқан еді. Ол филармония басшысы Ғалымжан Ерназаровтың харрасмент жасағанын ашық баяндап берген болатын. Бір күн өте сала, яғни бүгін екеуі татуласқанын, бір-бірінен кешірім сұрағандарын айтып, бірге бейнежазба жариялады, деп хабарлайды Orda.kz.

Наркенже Серікбаева әуелі өзін қолдағандарға алғысын айтты.

«Армысыздар, құрметті қазақ елі! Кешелі бері маған жанашырлық танытып, қолдау білдіріп жатқандарыңызға рахмет! Біз бүгін мекемеге келдік, әкімшіліктен арнайы комиссия құрылып, Ғалымжан мырза екеуміз түсіністік. Кешірім сұрастық. Қолдау білдіріп жатқандарыңызға рахмет!», – деді әнші.  

Ал басшысы ешқандай дау-дамайды ушықтырудың қажеті жоқ екенін, 

«Кешелі бері резонанс тудырып жатқан іс үшін жалпы кешірім сұраймыз. Әрбір үйдің мәселесі үйдің ішінде қалғаны дұрыс еді. Жалпы елге тарап кеткен соң облыстан комиссия келді. Комиссия екі тарапты да тыңдады. Талап-тарымызды қарады. Ешқандай бір-бірімізге қоятын ештеңе жоқ. Екі жақтан да келістік. Ешқандай дау-дамайды ушықтырып қажеті жоқ», – деді Ғалымжан Ерназаров.  

Еске сала кетсек, әнші Наркенже Серікбаева Шәмші Қалдаяқов атындағы Түркістан облыстық филармония басшысы Ғалымжан Ерназаров қысым түсірді әрі харрасмент жасады деп мәлімдеген еді. Ғалымжан Ерназаров сотқа шағымданғанын айтқан еді.