«Твиттердегі қанішер»: тоғыз адамның өмірін қиған маньяк өлім жазасына кесілді

Жапонияда тоғыз адамды өлтірген Такахиро Шираиши өлім жазасына кесіліп, үкім орындалды. Бұл елдегі соңғы үш жылда алғаш рет жүзеге асқан өлім жазасы. Ол құрбандарын Twitter арқылы тауып, пәтерінде тұншықтырып өлтіріп, денелерін бөлшектеп жасырған, деп хабарлайды Orda.kz.

Reuters агенттігінің дерегінше, Шираиши құрбандарын Twitter арқылы тауып, оларды пәтеріне шақырып, тұншықтырып өлтірген. Кейін мәйіттерін бөлшектеп, жасырып отырған. Құрбандардың сегізі — әйел, біреуі — ер адам. Осы әрекеті үшін ол «Твиттердегі қанішер» деген лақап атқа ие болған.

Жапонияның әділет министрі Кэисукэ Сузуки бұл үкімді бекітіп, «сот шешімі жасалған аса ауыр қылмыстарға толық сәйкес келеді» деді. Дегенмен  «елде мұндай қатыгездікке толы қылмыстар жалғасып жатқан кезде өлім жазасынан бас тарту әлі ерте», деп мойындады министр.

Бұл үкім — Жапонияда 2022 жылдан бері алғаш рет орындалған өлім жазасы. Елде аса ауыр қылмыс жасағандарға жаза дарға асу арқылы жүзеге асырылады. Үкімнің нақты күні сотталғандарға алдын ала хабарланбайды: олар жаза орындалатынын небәрі бірнеше сағат бұрын ғана біледі.

Қазір Жапонияда өлім жазасына кесілген 105 адам бар.

Еске сала кетейік, бұған дейін Индонезияда екі қазақстандық азамат ауыр қылмыс жасағаны үшін өлім жазасына тартылуы мүмкін екенін хабарладық.