Триатлоншыларға кедергі болған ішек инфекциясы

Қазақстандық триатлоншы Екатерина Шабалина Париждегі Сена өзенінен жүзу сәтіндегі қиыдықтарымен бөлісті.
 
Шабалина жарысты бастап жүзіп келе жатқанда басынан бірнеше рет соққы алып, суға тұншығып, ойынды кедергімен бастаған.

«Осыдан кейін мен жарыстың қалған бөлігінде ауыра бастадым. Велоспорт кезеңінің бірінші айналымынан соң әлім кетіп, құстым. Мен аяқтағаннан кейін дереу медициналық қызметкерлердің көмегіне жүгіндім, дәрігерлер ішек инфекциясын анықтады. Қазіргі уақытта дәрі қабылдап жүрмін. Денсаулығыма қатысты ешқандай нашарлау болмайды деп үміттенемін», - деді спортшы.

Бұған дейін патогендік бактериялардың көптігіне байланысты 1923 жылдан бастап Сенада жүзуге мүлдем тыйым салынған болатын. Бірақ өзен көп жылдардан кейін алғаш рет Олимпиадаға арнайы тазартылды. Олимпиада басталар алдында  Париж мэрі Анн Идальго суға түскен еді.