АҚШ смартфондар мен компьютерлерді өзара баж салығынан босатады

Тізімге басқа электроника түрлері де кірді. Бұл тұтынушыларды бағаның күрт өсуінен қорғап, Apple және Samsung сияқты электрондық өнеркәсіп алыптарына пайда әкелуі тиіс, деп хабарлайды Orda.kz Bloomberg агенттігіне сілтеме жасай отырып.

Ерекшеліктер сондай-ақ мониторларға, қатты дискілерге, компьютерлік процессорларға, жартылай өткізгіш чиптерге және жад микросхемаларға қолданылады.

АҚШ-тың Кедендік және Шекара қызметі Дональд Трамп Қытайдан әкелінетін өнімдерге 145 пайыздық баж салығын енгізгеннен кейін осындай ерекшеліктер жарияланды. Бұл қадам iPhone мен Қытайдағы басқа да өнімдердің көбін өндіретін Apple сияқты технологиялық компанияларға соққы болуы мүмкін.

Басылымның хабарлауынша, тарифтік шегерім қысқа мерзімде қолға алынып, уақытша болуы мүмкін. Бұл тауарларға ақыр соңында қосымша баж салығы салынатыны сөзсіз, бірақ олар аталған 145% мөлшерлемеден төмен болуы да ықтимал.

Қытай да қарап жатпай, Оттаваның Қытай импортына баж салығын енгізгеніне жауап ретінде кері салық түрлерін жариялады. Себебі, Қытайда өндірілген барлық электр көліктеріне 100 пайыз, болат пен алюминий импортына 25 пайыз қосымша салық салынды.

1 ақпанда АҚШ президенті Дональд Трамп Қытайдан, Канададан және Мексикадан АҚШ-қа импортталатын тауарларға, сондай-ақ Канада энергетикасына баж салығын енгізетінін мәлімдеді.

Жақында ғана Ақ үйдің ресми өкілі Каролин Левитт Қытай басшылығына АҚШ-пен сауда соғысының өршуі салдары туралы ескерту жасады. Атап айтқанда, ол Бейжің АҚШ-тың қосымша баждарына жауап ретінде қарсы шаралар қолдануды жалғастырса, өздеріне «өте жаман болады» деп сес көрсетті.

АҚШ кеденшілері 57 ірі сауда серіктестері өнімдеріне неғұрлым жоғары баж салығын ала бастайды. Тізімде Қазақстан да бар. Алайда енгізілген тарифтік шаралар АҚШ-қа қазақстандық экспорттың жалпы көлемінің 4,8% -ын ғана қамтиды.