Трамп тарифтік саясаттағы көзқарасын өзгертіп, АҚШ-та баға көтерілгеннен кейін азық-түлік бажын алып тастады

АҚШ президенті Дональд Трамп 200-ден астам тауарларға, соның ішінде негізгі азық-түлік тауарларына көтерілген тарифтерді алып тастады, деп хабарлайды Orda.kz.

Ол америкалықтардың наразылығы артып келе жатқанынан сескеніп осындай әрекетке барды. Баж салығы кофе, сиыр еті, банан, апельсин шырыны және басқа да жаппай сұранысқа ие күнделікті қолданатын өнімдерден алынып тасталды,  деп хабарлайды Ақ үй. Шара 13 қарашада түн ортасынан бастап күшіне енді.

Deutsche Welle хабарлағандай, бұл шешім Трамптың сауда саясатындағы күрт өзгеріс болды. Бұған дейін ол жыл басында енгізілген жоғары баж салығы бағаның өсуіне әкелмейді деп айтқан болатын. Air Force One бортындағы журналистердің сұрақтарына жауап бере отырып, Трамп тарифтер «кейбір жағдайларда» бағаны көтеретінін мойындады. Сонымен қатар, ол елде «іс жүзінде инфляция жоқ» екенін атап өтті.

Президент әлеуметтік бастамалардың күшін жоймайтынын және алдағы жылы кірісі төмен және орташа америкалықтарға бұрын енгізілген баж салықтары есебінен 2000 доллардан төлеуді жоспарлап отырғанын айтты.

Айтпақшы, 13 қарашада Трамп үкіметті қаржыландыру туралы заңға қол қойып, АҚШ тарихындағы ең ұзақ шатдаунға нүкте қойды.

Бір апта бұрын  АҚШ-та мемлекеттік бюджет туралы дау аясында жалақы алмаған ұшқыштар жұмысқа шықпай қойды. Соңғы бірнеше күнде АҚШ-тың 12 ірі қаласында мыңдаған әуе рейстері тоқтатылып, үшақтар ұшпай қалды.

18 қазанда америкалықтар тағы да өре көтеріліп, көшеге шықты. Олар АҚШ президентінің «авторитарлық үрдістері мен шексіз сыбайлас жемқорлығына» қарсылық білдірді. Елде 2500-ден астам митинг өтті, олардың ең ірілері Вашингтонда, Нью-Йоркте және Чикагода болды.