Трамп Канададан келетін тауарларға 50 пайыздық баж салығын енгізді

АҚШ президенті Дональд Трамп 2026 жылғы 19 тамыздан бастап Канададан импортталатын кең ауқымды тауарларға қосымша 50 пайыздық баж салығын енгізеді, деп хабарлайды  Orda.kz.        

Бұл шешім АҚШ тауарларына қатысты кемсітуші шектеулерге жауап ретінде қабылданғаны туралы White House хабарламасында айтылды.

«Президент Трамп үш прокламацияға қол қойды… олар Канада тарапынан америкалық өнімдерге жасалған кемсітушілікке жауап ретінде белгілі бір тауарларға қосымша 50 пайыздық баж енгізуді көздейді» деп жазылған мәлімдемеде. 

Ақ үйдің мәліметінше, бұл шара арқылы Трамп Канада тарапынан АҚШ саудасына келтірілген қиындықтар мен теңсіздікті өтеп, негізгі америкалық экспорттық тауарлар – автокөліктер, алкоголь және сүт өнімдері үшін бәсекелестік жағдайды теңестіруді мақсат етеді.

Шектеулер шамамен 300-ге жуық тауар түріне әсер етеді. Олардың қатарында смартфондар, радарлар, байланыс станциялары, цемент, пластмасса және қаптама өнімдері, тоқыма және киім-кешек, сондай-ақ жиһаз бен спорттық жабдықтар (коньки мен хоккей таяқтары) бар. Сонымен қатар, канадалық бал, тірі өсімдіктер, қағаз және өнер туындылары да қосымша баж салығына ілікті.

Сондай-ақ канадалық өндірістегі алкоголь өнімдері мен сүт өнімдердің көбіне жоғары баж енгізілді. Ал жаңа тарифтер энергия тасымалдаушыларға, калий тыңайтқыштарына, балыққа және стратегиялық маңызды минералдарға қолданылмайды.

13 шілдеде Трамп Канада билігін орман алқаптарындағы қоқысты тазаламады деп айыптап, оның салдарынан АҚШ-та ауа ластанып жатқанын мәлімдеген. Ол бұл «немқұрайлылықтың» орнын толтыру үшін тарифтерді арттырумен қорқытқан еді.

Қаңтар айының соңында Трамп Канада Қытаймен сауда келісімін жасайтын болса, АҚШ-қа әкелінетін барлық канадалық тауарларға 100 пайыздық баж салығы енгізілетінін де ескерткен.

Оқи отырыңыз:

• Трамп Ормуз бұғазындағы кемелерге ақы енгізу ұсынысынан айнып қалды
  
  
• «Мың зымыранды Иранға бағыттаймын»: Трамп ультиматум қойып, тағы қорқытты