Тоқаев жазушы Дулат Исабековтің жақындарына көңіл айтты

Мемлекет басшысы көрнекті жазушы, драматург, Қазақстан Еңбек Ері Мемлекеттік сыйлығының лауреаты Дулат Исабековтің туған-туыстары мен жақындарына көңіл айту жеделхатын жолдады, деп хабарлайды Orda.kz.

Қасым-Жомарт Тоқаев өз жолдауында Исабековтің бүкіл өмірін ұлттық әдебиетке арнағанын және еліміздің мәдени мұрасында терең із қалдырғанын атап өтті.

«Дулат Исабекұлы ұлағатты ғұмырын ұлт әдебиетіне арнаған, тағылымды туындыларымен оқырман санасына шамшырақ бола білген нағыз дегдар тұлға еді. Халқымыздың рухани әлемін байытуда, ұлттық прозамыздың көкжиегін кеңейтуде аянбай тер төгіп, өнегелі өмір сүрді. Қуатты қаламынан туған сүбелі шығармалары, драмалық еңбектері әлем сахналарын бағындырып, дүние жүзіне киелі сөз өнерімізді дәріптеді. Соңына әдеби мол мұра қалдырған Дулат Исабекұлының жарқын бейнесі мен ардақты есімі халқымыздың жүрегінде мәңгі сақталады. Марқұмның иманы саламат, жаны жәннатта болсын» деп жазылған жеделхатта.

Дулат Исабековтің қайтыс болғаны 21 ақпанда белгілі болды. Қайғылы хабарды Қазақстан Жазушылар одағы төрағасының орынбасары Қасымхан Бегманов жеткізді.