Тоқаев судьялар қатарында жүрген алаяқтар мен жемқорларды жұмыстан шығарды

Президент Тоқаев сот жүйесіндегі қызметкерлердің кейбірін қызметінен босатты. Олардың лауазымынан айырылуы сенімнің жоғалуы мен қызметтік этиканың бұзылуына байланысты, деп хабарлайды Orda.kz.

Мемлекет басшысы барлық деңгейдегі соттардың төрағалары мен судьяларын тағайындау және босату туралы Жарлыққа қол қойды. Құжат барлық аймақтарға қатысты.

Көбі әдеттегі себептермен — зейнеткерлікке шығу, өкілеттік мерзімінің аяқталуы, жеке қалауы бойынша қызметінен кетті.

Жетісу облысы Ақсу аудандық сотының төрағасы Нұрлан Шаймерденов пара алғаны үшін сотталды. Ақтау қалалық сотының басшысы Бауыржан Шайдуллин де алаяқтық пен сыбайлас жемқорлық үшін жазасын өтеп жатыр. 

Тағы бірі — Ғалым Қалдаров, Шымкенттегі әкімшілік құқық бұзушылық жөніндегі соттың төрағасы. Ол теріс қылық жасап, тәртіп бұзғаны үшін сот алқасының шешімімен орынын босатты. 

Жаңа қызметке келгендер арасында әйелдер де бар. Кейбіреулер аудандық соттан қалалық соттарға ауыстырылды. Алматыда, Ақмола, Ақтөбе, Атырау, Батыс Қазақстан, Қостанай, Солтүстік Қазақстан, Түркістан және Шығыс Қазақстан облыстарында жаңа төрағалар тағайындалды.

Айта кетейік, Хасан қылмыстық тобының мүшесі 17 жылдан соң қолға түсті.