Тоқаев: Отан үшін от кешкендер ұмытылмайды

Мемлекет басшысы өз сөзінде майдангерлер мен тыл еңбеккерлерінің ерлігін, Қазақстанның екінші дүниежүзілік соғыстағы жеңіске қосқан үлесін атап өтті, деп хабарлайды Orda.kz.

Миллиондаған қазақстандықтар майданда шайқасып, тылда еңбек етті, әскерді барлық қажеттіліктермен қамтамасыз етті. 500-ден астам адам Батыр атағын алды, жүзден астамы Даңқ орденінің толық иегері атанды.

Тоқаев Қазақстанда соғыс батырларының есімін сақтауды жалғастыратынын атап өтті. Олардың құрметіне ескерткіштер тұрғызылады, фильмдер түсіріледі, кітаптар шығарылады, ал олардың есімдері көшелер, мектептер, мұражайлар мен әскери нысандарға беріледі.

Қымбатты отандастар!

Сіздерді Жеңіс күнімен шын жүректен құттықтаймын!

Бүгін біз майдан даласында Отан үшін от кешіп, ерлік жасаған жауынгерлерге және тылда табанды еңбек еткен ардагерлерге шынайы ризашылық сезіммен тағзым етеміз. Қасіретті жылдардың барлық ауыртпалығын қайыспай көтеріп, Жеңіске жеткен аға буынға айрықша құрмет көрсетеміз. 

Еліміз ортақ Жеңіске өлшеусіз үлес қосты. Екінші дүниежүзілік соғыс кезінде миллиондаған отандасымыз жанқиярлықпен шайқасты, аянбай жұмыс істеп, әскерді керек-жарақпен қамтамасыз етті. 

Жүзден астам жерлесіміз «Даңқ» орденінің толық кавалері атанды, бес жүз адам Батыр атағын алды, ондаған мың азамат жауынгерлік ерлігі және қажырлы еңбегі үшін марапатталды. 

Біз аға буынның өшпес даңқын ешқашан ұмытпаймыз. Жаужүрек сардарлар мен сарбаздардың құрметіне мемориалдар орнатылды, кітаптар шығарылып, фильмдер түсірілді, сондай-ақ көшелерге, мектептерге, музейлерге, әуежайларға, әскери бөлімдер мен институттарға ел қорғаған ерлердің есімі беріліп жатыр.

Қаһарман ардагерлеріміздің ерен ерлігінің мән-мағынасын өскелең ұрпақтың санасына сіңіру – бүгінгі буынның қасиетті парызы. 

Біз ержүрек майдангерлердің қайтпас қайсарлығы мен асқақ рухының арқасында дербес әрі бейбіт елде өмір сүріп келеміз, сондай-ақ, төл мәдениетімізді дамытып, қазіргі заманның игілігін сезініп отырмыз. 

Қазақстанды бүкіл әлем біледі және құрметтейді. Біз жаңа Конституция ережелеріне сәйкес Әділетті Қазақстанды құрып жатырмыз. 

Ата заңымыз ешкімді ұлтына, наным-сеніміне қарай бөліп-жармайды, барлық азаматтың құқықтары мен бостандықтарын бірдей қорғайды. 

Ұлы Жеңіс күні – ең алдымен, жауынгерлік ерлігі мен жігерлі еңбегінің арқасында мамыражай заманға жеткізген батырларымыздың есімін ел жадында жаңғырту күні. Бұл – ұлан-асыр тойға емес, мәнді әрі мағыналы ойға шақыратын мереке. 

Халқымыздың бейбіт өмірге және өсіп-өркендеуге ұмтылысының айқын көрінісі іспеттес көк байрағымыз әрдайым ашық аспан астында желбіресін! 

Ұлы Жеңіс күні құтты болсын!

Оқи отырыңыз:

• Тоқаев парадқа қатысу үшін Мәскеуге барды
• Қасым-Жомарт Мәскеуде Тоқаев Владимир Путинмен кездесу өткізді
• Тоқаев Алатау қаласының құқықтық мәртебесі туралы заңға қол қойды