Тоқаев Италияны еліміздегі сирек жер металдарын барлауға шақырды

Президент Қасым-Жомарт Тоқаев Қазақстанда сирек жер металдарын өндіру бойынша Италиямен бірлесіп жұмыс істеуді ұсынды, деп хабарлайды Orda.kz.

Бұл ұсынысты Мемлекет басшысы елімізге ресми сапармен келген Италия Премьер-министрі Джорджия Мелониге айтты.

«Өнеркәсіптік кооперацияны кеңейту зор мүмкіндіктерге жол ашады. Бұл тұрғыда Қазақстан сирек жер металдарының мол қорына ие және біз бұл бағытта Италиямен бірлесіп жұмыс істеуге дайынбыз. Қазақстан Орталық Азиядағы сирек жер металдары кен орындары туралы өзекті ақпаратты жинақтайтын аймақтық зерттеу орталығын құру туралы бастама көтерді. Біз италиялық компанияларға бірлесіп геологиялық барлау және сирек жер элементтері мен минералдарын өндіру үшін қолайлы жағдай ұсына аламыз. Бұл «инвестициялар мен технологиялар — стратегиялық шикізатқа айырбас» формуласы бойынша жүзеге асады», – деді Тоқаев «Орталық Азия – Италия» саммитінде сөйлеген сөзінде. 

Сондай-ақ, Президент Тоқаев Қазақстанның Италияға мұнай экспорттаудағы мүмкіндіктері туралы да айтып өтті.

Қазақстан президенті мен Италия премьер-министрі Ақордада кездесу өткізіп, бірқатар маңызды мәселелерді талқылады.

Рим папасының қазасына байланысты Италия премьер-министрінің сәуірде Қазақстанға жоспарланған сапары кейінге шегерілген болатын.