Италия премьер-министрі Тоқаев туралы не ойлайтынын бүкпесіз айтты

Қазақстан президенті мен Италия премьер-министрі Ақордада кездесу өткізіп, бірқатар маңызды мәселелерді талқылады, деп хабарлайды Orda.kz.

Италия – Қазақстанның әлемдегі үшінші, ал Еуропадағы ең ірі сауда серіктесі. Қасым-Жомарт Тоқаев мұның кездейсоқтық емес екенін атап өтті 

«Біз ынтымақтастығымыздың жоғары қарқынын сақтап, одан әрі дамытуымыз керек деп ойлаймын. Сіздің Қазақстанға сапарыңыз маңызды рөл атқарады»,– деді мемлекет басшысы. 

Джорджа Мелони Қасым-Жомарт Тоқаевпен әңгімелесуді өзі үшін өте маңызды деп атап өтті. Ол Тоқаевты прагматик көшбасшы деп санайтынын айтты:

«Бізге ашық диалог қажет және сіз мұны өте жақсы түсінесіз. Біздің ынтымақтастығымыз әрдайым жемісті болды. Бірақ энергетикадан бастап мәдениетке дейін, университеттеріміз бен халықтарымыз арасындағы байланысты нығайтуға мүмкіндік көп. Сізді мен кездестірген ең прагматик көшбасшылардың бірі деп санаймын. Қазіргі сын-қатерлерді терең түсінетін адаммен сөйлесу – үлкен мәртебе», – деді Джорджа Мелони.

Кездесу барысында сауда қатынастары туралы да сөз қозғалды. Екі ел арасындағы тауар айналымы 20 миллиард доллардан асты. Сонымен қатар, Қазақстанда ENI, SDF Group, PetroValves, Maire Tecnimont және Ballestra сияқты ірі инвесторларды қоса алғанда, 270-ке жуық итальяндық компания жұмыс істеп жатыр.

Мемлекет басшылары бірлескен мәлімдеме қабылдады. Ресми делегациялар мынадай құжаттармен алмасты:

• Үкіметтер арасындағы адамдарды реадмиссиялау туралы келісім;
• Сынама қазбалар мен шикізат саласындағы ынтымақтастық туралы мәлімдеме;
• «Самұрық-Қазына» АҚ мен Maire Tecnimont арасындағы меморандум;
• «Самұрық-Қазына» АҚ мен Ansaldo арасындағы келісім;
• Су ресурстарын басқару бойынша білім мен тәжірибе алмасу бағдарламасын жүзеге асыруға арналған меморандум;
• Қазақстанның Даму Банкі, Cassa Depositi e Prestiti S.p.A. және SACE SpA арасындағы бірлескен декларация;
• «Самұрық-Энерго» АҚ мен SACE SpA арасындағы өзара түсіністік туралы меморандум;
• Kazakh Invest пен Italian Trade Agency арасындағы ынтымақтастық туралы меморандум.