Тоқаев: Бюджет қаражатын игере алмай отырсыздар

Мемлекет басшысы жыл бойы кейінге қалдырып, жыл соңына қарай бюджет қаражатын жаппай игеруге ұмтылатын шенеуніктерді қатаң сынға алды, деп хабарлайды Orda.kz.

Президенттің айтуынша, бұл жағдай бүгінде нақты игеруге емес, қаражатты қалай да жұмсап құтылуға тырысуға айналып кеткен.

«Бюджет қаражатын игеру деген қазіргі критерийден мемлекеттік инвестициялар тиімділігін басқару қағидатына көшу қажет. Жыл соңында бюджетті игеруге асығу — бұл зиянды әрі дұрыс емес. Мен сіздерге ашық айтайын, кім мұндай міндет тапсырды?  Жылдың соңында сол баяғы «бюджет игеру» жарысы басталады. Бұл, шын мәнінде, бюджет қаражатын жай ғана шашу. Басқаша айту мүмкін емес. Бұл  дұрыс емес. Барлық «игеру ережелерін» қайта қараңыздар. Қазір басқа уақыт келді. Әлемде не болып жатқанын айтпай-ақ қояйын, өздеріңіз білесіздер. Бір ғана әскери операциямен ірі геосаяси міндеттер шешіліп жатыр. Ал сіздер болсаңыздар, игеру мен бос шығынның ара-жігін ажырата алмай отырсыздар. Бұны реттеңіздер», – деді Президент.

Сондай-ақ Қасым-Жомарт Тоқаев фискалдық саясатты қатаңдатуды және бюджеттік шығыстарға тәртіп орнатуды талап етті. Оның айтуынша, тиімділіктің басты шарттары — бюджеттік шоғырландыру мен қатаң қаржылық тәртіп.

Мемлекет басшысы қолданыстағы бюджеттік бағдарламаларға толық ревизия жүргізіп, тиімсіз шығындарды қысқартуды тапсырды. Қаржы министрлігі мен ұлттық экономика министрлігіне мемлекеттік инвестициялардың тиімділігін бағалауды басшылыққа алып, «қаражат игеру» деген формалды өлшемнен бас тарту жөнінде қатаң әрі принципті түрде әрекет ету міндеттелді.

Үкімет пен әкімдіктерге 1 мамырға дейін бюджеттік бағдарламаларды қайта қарап, мемлекет қаржысы есебінен, соның ішінде квазимемлекеттік секторда қаржыландырылатын жобаларды іріктеу тетігін жетілдіру тапсырылды.

Сонымен қатар Президент шығындардың ашықтығын арттыру үшін цифрлық теңгені қолдану аясын кеңейту қажеттігін еске салды. Қазіргі таңда бұл құрал мемлекеттік сатып алуларда, субсидиялау жүйесінде және Ұлттық қор қаражаты есебінен жобаларды қаржыландыруда пайдаланылып келеді. Алдағы уақытта оны өзге салаларға да кеңінен енгізу жоспарланып отыр.

Оқи отырыңыз:

• Президент құзырлы орындар шешімді созбалаңға салатынын сынады
• Президент жеке цифрлық деректерді қорғау қажеттігін мәлімдеді