Тоқаев Алматы әкіміне жаңа жобаларды жетілдіру міндетін қойды

Мемлекет басшысы Алматы қаласының әкімі Дархан Сатыбалдыны қабылдады. Қасым-Жомарт Тоқаевқа қаланың әлеуметтік-экономикалық ахуалы және негізгі даму бағыттарының іске асырылуы туралы баяндалды, деп хабарлайды Orda.kz.      

Дархан Сатыбалдының айтуынша, қала экономикасында оң динамика байқалады.  2025 жылдың қорытындысы бойынша өсім 6,5 пайызды болды, ал биылғы қаңтар-ақпан айларында қысқа мерзімді экономикалық индикатор 9,4 пайызға жетті. Негізгі көрсеткіштер өнеркәсіп, құрылыс, көлік және сауда салалары есебінен болған. 

Шаһардың инвестициялық портфелі 2,8 триллион теңгеден асады. «Алматы» индустриялық аймағы мен «Алатау» арнайы экономикалық аймағына жаңа жобаларды тарту мақсатында кеңейту жұмыстары жүргізілуде.

Алматы әкімі еліміздің IT секторында жетекші рөл атқаратынын атап өтті. Цифрландыру аясында Almaty AI Park қалыптасып, жасанды интеллект негізіндегі бейнемониторинг пен талдау жүйесі дамып келе жатқанын айтты.

«Туризм мен тау кластерін өркендету жалғасады. Биыл «Шымбұлақты» жаңғырту, іргелес шатқалдарды дамыту жұмыстары басталады. Жобаларды іске асыру 2029 жылғы Қысқы Азия ойындарына дайындық шараларымен бірге жүргізіледі. Сонымен қатар қонақүй инфрақұрылымы кеңейтіліп жатыр» ,—  деді Алматы әкімі. 

Бас жоспарды түзету аяқталуға жақын. Онда қала ішіндегі орталық моделін дамыту және тау бөктеріндегі аумақта құрылысқа шектеу енгізу көзделген.

«Қоғамдық көлік қызметін жақсарту, соның ішінде BRT желісін кеңейту, метро құрылысы және жаңа транспорттық шешімдерді пысықтау негізгі басымдық саналады»,— деп баяндады Дархан Сатыбалды.  

Алматы әкімінің айтуыша, инженерлік инфрақұрылым және сумен жабдықтау жүйесі жаңартылып жатыр. Экологияға күн тәртібінде ерекше назар аударылып, жылу көздерін жаңғырту және шығарындыларды азайту шаралары қолға алынған.

Кездесу соңында мемлекет басшысы Almaty AI Park жобасын жеделдету, сондай-ақ LRT және SkyTrain жүйелерін енгізу жұмыстарын жандандыру бойынша бірқатар тапсырма берді.

Оқи отырыңыз:

• Тоқаев Қазақстан халқын Ораза айт мерекесімен құттықтады
• ЛРТ және «кірешілер»: арқанмен вагон сүйреген жұмысшылар мемге айналды
• Қазақстанда несие беру талаптары жаңартылды