Қазақстанда несие беру талаптары жаңартылды

Елімізде бір ай төлем жасамағандарға жаңа несие беру шектеледі. 19 наурыздан бастап тұтынушылық несиелерге қатысты жаңа ережелер күшіне енді, деп хабарлайды Orda.kz.      

Енді төлемді кешіктірген азаматтарға несие алу қиындай түседі. Бұл өзгерістер жыл басында қабылданған «Банктер және банк қызметі туралы» заң аясында енгізіліп отыр.

Бұрын қарызды 90 күннен астам уақыт өтемегендерге ғана несие беруге тыйым салынатын. Енді бұл мерзім 30 күнге дейін қысқартылды. Яғни, бір айдан аса төлем жасалмаса, жаңа несие рәсімдеуге шектеу қойылады.

Осылайша, кез келген берешегі бойынша 30 күннен артық кешіктірген азаматтар енді жаңа тұтынушылық несие ала алмайды. Сонымен қатар, онлайн немесе кепілсіз несие алу кезінде міндетті түрде биометриялық сәйкестендіруден өту талабы да күшіне енді.

Жаңа талаптар банктердің жауапкершілігін де күшейтеді. Егер клиенттің шотына немесе несиесіне қатысты алаяқтық әрекеттер анықталса, банк бұл туралы 1 күн ішінде хабарлап, 2 күнде бұзушылықтарды жоюы керек. Ал толық салдарын 10 күн ішінде реттеуге міндетті.

Бұған дейін Қазақстанда экономикалық белсенді халықтың шамамен жартысы несие алуға тыйым орнатқаны хабарланған еді.  5,1 млн-нан астам азамат «Stop-credit» қызметі арқылы өз атына несие мен микронесие рәсімдеуге ерікті түрде тыйым қойған.

Оқи отырыңыз:

• Несие алу қиындайды:Ұлттық банк қосымша шектеулер енгізеді
• Қазақстанда ипотека алу қиын әрі қымбат. Неге?
• Несиені уақтылы төлей алмағандар не істеуі керек?