Тісін емдеймін деп барып, ажал құшқан жігітке қатысты қылмыстық іс қозғалды

Астанада тіс емдеу орталығындағы 20 жастағы жігіттің өліміне байланысты қылмыстық іс қозғалды. Құқық қорғау органдары сотқа дейінгі тергеуді бастады, деп хабарлайды Orda.kz.      

Астана қаласында 20 жастағы Есболған Мұрат Жеңісханұлының туыстары оның Tem.Dent стоматологиясына барғаннан кейін қайтыс болғанын мәлімдегенін жазған едік. Олардың айтуынша, жас жігіт дәрі егілгеннен кейін көз жұмған.

Алдын ала мәліметтерге сәйкес, ем барысында пациентке дәрі егілгеннен кейін оның жағдайы күрт нашарлаған. Әлеуметтік желіде марқұмға аллергиялық сынама жасалмағаны жазылды. 

Жақындарының сөзінше, 2005 жылы туған жігіт қабылдауға еш шағымсыз, тек тісін емдету үшін келген. Инъекция алдында оған аллергиялық сынама жасалмаған. Алғашқы екпеден кейін жігіттің денесі құрыса бастаған. Туыстарының айтуынша, соған қарамастан оған қайтадан дәрі егілген.

Кейін жігіт есінен танып қалған. Оқиға орнына жедел жәрдем шақырылғанымен, отбасының айтуынша, оны аман алып қалу мүмкін болмаған.

Марқұмның туыстары екпені дәрігер емес, тәжірибеден өтіп жүрген студент жасағанын, ал жанында медбике болғанын айтады. Сонымен қатар, олардың сөзінше, болған жағдай туралы ата-анасына бірнеше сағаттан кейін ғана хабарлаған.

Қайтыс болған жігіттің отбасы оқиғаның мән-жайын мұқият тергеуді талап еткен болатын.

Бұл дерек ресми түрде расталған жоқ. Жауапты министрлік тексеріс жүргізіп, медициналық қызмет көрсету талаптарының сақталуын тексеріп жатыр.

Оқи отырыңыз:

• Астанада 20 жастағы жігіт тісін емдеймін деп барып, өмірінен айырылды
• Қазақстанда заңсыз айналымнан 12 тоннадан астам алтын тәркіленді
• Астанада үй ауласында баланы көлік қағып қаза болды