Тимур Құлыбаевқа тиесілі 250 млн теңгелік айлақ көпірі мемлекет меншігіне қайтарылды

Атырауда Қазақстандағы ең бай кәсіпкерлердің бірі Тимур Құлыбаев бақылайтын «Кипрос» ЖШС-нен құны 250 млн теңге болатын айлақ көпірі тәркіленіп, мемлекетке қайтарылды, деп хабарлайды Orda.kz тілшісі.

Атырау облыстық прокуратурасының актісі бойынша, пайдаланылмаған жер учаскесі, нақтырақ айтқанда айлақ көпіріне арналған 3,46 гектар жер, мемлекет меншігіне өтті. Жер телімінің нарықтағы бағасы — 250 миллион теңге. Бұған дейін бұл жер «Кипрос» ЖШС-нің иелігінде болған.

«Прокуратура актілері негізінде Атырау облысында жалпы көлемі 31 432 гектар болатын 16 игерілмеген жер учаскесі мемлекетке қайтарылды. Олардың жалпы құны — 196 млн теңге. Жер заңнамасының сақталуы облыстық прокуратураның тұрақты бақылауында», деп мәлімдеді Атырау облысының прокуратурасы.

«Кипрос» ЖШС — Нұрсұлтан Назарбаевтың күйеу баласы Тимур Құлыбаевтың негізгі активтерінің бірі.