Теміртауда үш бала ток соғып, жансақтауда жатыр: Тұрғындар бұрыннан дабыл қаққан

Қарағанды облысының Теміртау қаласында үш кәмелетке толмаған бала электр тогынан зардап шегіп, ауруханаға түсті. Оқиға 22 сәуір күні 4 А ықшамауданындағы тұрғын үйлер маңында болған, деп хабарлайды Orda.kz.

Алдын ала мәлімет бойынша, балалар 8/1 және 9/1 үйлердің жанындағы құрылыс алаңында ойнап жүрген. Тұрғындардың айтуынша, қоршау бойымен трансформаторлық орынға тартылған жоғары кернеулі кабель өтеді. Сол кабель салбырап тұрған.

Куәгерлердің сөзінше, балалардың бірі құрылыс аумағына түсіп кеткен допты алу үшін қоршаудан асуға тырысқан кезде ток соққан. Оған көмектеспек болған тағы екі бала да зардап шеккен.

Қарағанды облысының денсаулық сақтау басқармасы барлық зардап шеккендердің ауруханаға жеткізілгенін хабарлады. Дәрігерлер олардың жағдайын орташа ауыр деп бағалаған. Балалар жансақтау бөлімінде ем алып, кейін бейінді бөлімшеге ауыстырылған.

Жергілікті тұрғындар бұл мәселені бұрын да көтергенін айтады. Олардың сөзінше, салбырап тұрған кабельге қатысты бірнеше рет тұрғын үй-коммуналдық шаруашылық бөліміне шағым түсірілген. Соңғы өтініш 2 наурыз күні фото және видео материалдармен бірге жолданған.

Полиция бұл дерекке қатысты «Салғырттық» бабы бойынша қылмыстық іс қозғады. Қазір оқиғаның барлық мән-жайын анықтау үшін тергеу жүргізіліп жатыр.

Оқи отырыңыз:

• Алматыда Розыбакиев көшесін Мұхтар Шахановтың атына беруге петиция жарияланды
• Қазақстанда әскерден жалтарғандарға жаңа шара әзірленіп жатыр