Алматыда Розыбакиев көшесін Мұхтар Шахановтың атына беруге петиция жарияланды

Алматы тұрғындары мен бірқатар қазақстандықтар қалалық ономастикалық комиссияға Розыбакиев көшесінің атауын өзгертіп, оны халық жазушысы, Қазақстанның Еңбек Ері Мұхтар Шахановтың атына өзгерту туралы петиция жариялады, деп хабарлайды Orda.kz.

Өтініш авторлары Мұхтар Шахановтың тәуелсіз Қазақстан тарихындағы ірі тұлғалардың бірі екеніне назар аудартты. Олар ақынның 1986 жылғы Желтоқсан оқиғаларын тарихи тұрғыда ақтаудағы рөлін ерекше атап өтеді. 1989 жылы КСРО халық депутаттарының съезінде Шаханов Алматыдағы оқиғаларды тергеу үшін арнайы комиссия құруды талап етіп, кейін бұл комиссия «қазақ ұлтшылдығы» туралы тұжырымды қате деп тануға ықпал еткен.

Бұдан бөлек, бастама иелері оның қазақ тілін қорғаудағы ұстанымын, ұлттық мәселелерге қатысты белсенді позициясын және әдеби еңбектерінің халықаралық деңгейде мойындалғанын алға тартады. Шаханов — ондаған тілге аударылған 30-дан астам кітаптың авторы, Шыңғыс Айтматовпен бірлескен шығармалары да әлемдік әдеби мұраға енген.

Құжатта ақынның мемлекеттік және халықаралық деңгейдегі марапаттары да көрсетілген. Олардың қатарында «Қазақстанның Еңбек Ері» атағы, Қазақстанның халық жазушысы және Қырғызстанның халық ақыны атақтары бар.

Ұсыныс авторлары Розыбакиев көшесін таңдау себебін Алматыдағы ірі көлік артерияларының бірі екенімен түсіндіреді. Ұзындығы шамамен 7 шақырым болатын көше Бостандық және Алмалы аудандары арқылы өтеді, оның бойында Almaty Management University, Тұңғыш президент қорының спорт кешені және MEGA Alma-Ata сауда орталығы сияқты маңызды нысандар орналасқан.

Сонымен қатар олар Абдулла Розыбакиевтің тарихи тұлға ретіндегі маңызын жоққа шығармайтынын да атап өткен. Ол 1930-жылдардағы саяси қуғын-сүргін құрбаны болған, 1957 жылы ақталған. Осыған байланысты бастама иелері оның есімін басқа форматта есте қалдыруды, мысалы, шағын нысанға беру немесе мемориалдық тақта орнату мәселесін қарастыруды ұсынады.

Оқи отырыңыз: 

• Президент БҰҰ-ның жоғары өкілдер тобымен кездесті, Оман премьер-министрі орынбасарын марапаттады
• Алматыда аялдамада белгісіз адам зейнеткерді есінен танғанша ұрды