Теміртауда қарияны ұрып-соққан күдіктілер қамауға алынды

Теміртау қаласында зейнеткерді ұрып-соққан жасөспірімдер екі айға қамауға алынды, деп хабарлайды Orda.kz.

Теміртауда зейнеткерді ұрып-соққан күдіктілерге қатысты қылмыстық іс қозғалды.

Күдікті ретінде танылған 9 адамның барлығы, оның ішінде 7 кәмелетке толмаған жасөспірім, уақытша ұстау изоляторына қамалды. Оларға қатысты Теміртау қалалық соты екі ай мерзімге қамау туралы бұлтартпау шарасын таңдады. Қазіргі уақытта іс бойынша қажетті сараптамалар тағайындалып, жан-жақты тергеу жүргізілуде.

Сонымен қатар, кәмелетке толмағандардың ата-аналарына қатысты да қылмыстық іс қозғалды. Бұл факті бойынша бөлек тергеу жүргізілуде.

Еске салайық, Теміртауда кәмелетке толмағандар жалғызбасты қарияның үйіне баса-көктеп кіріп, оны ұрып-соққан. Көп ұзамай, қарияға соққы жасаған жасөспірімдерді олардың қатарластары ұрып кетті.