«Темекімен күйдірді»: Алматы облысында 16 жастағы қызды қорлаған әкімдік қызметкері анықталды

Алматы облысында әкімдік қызметкері мен тағы бір әйелдің 16 жастағы қызды ұрлап, оған қорлық көрсеткені белгілі болды, деп хабарлайды Orda.kz.

Алматы облысында 16 тамызда 16 жастағы қызды 1996 жылы туған екі әйел ұрлап, азаптаған. 

«Күдіктілердің бірі Масақ ауылдық округі әкімінің аппаратында қызмет істегені анықталды. Олар жасөспірімді ұрып-соғып, темекімен күйдіріп, өзенге батырып, зорлық-зомбылық көрсеткен. Барлық әрекеттерін бейнежазбаға түсіріп, артынша бейнежабаны таратамыз деп қорқытып, 3 миллион теңге талап еткен»  деп жазды НеМолчи қоры.

Алайда НеМолчи мәліметіне сәйкес, Алматы полициясы оқиғаның егжей-тегжейін, сондай-ақ көпке рұқсатсыз жария етуге болмайтын жеке ақпаратты да таратып жіберген. Қазір WhatsApp чаттарында қылмыс жайлы ақпарат тарап, жәбірленушінің туыстары мен олардың ауыл тұрғындары оқиғаны біліп отыр.

«Мұндай қызметкерлер жауапкершілікке тартыла ма? Біз оларды ҚР ҚК-нің 147-бабы («Жеке өмірге қолсұғушылық, жеке және отбасы құпияларын заңсыз тарату») бойынша жауапқа тартады деп үміттенеміз»  деп жазды қор.

Еске сала кетейік, Алматы қаласының №116 мектебінде бір мұғалімнің 18 жыл бойы жалған дипломмен ұстаз болып жұмыс істегені анықталды.