Темекі шеккені үшін тізімнен шығарылған тыл ардагерін әкім арнайы құттықтады

Жергілікті тілшілеріміздің мәліметінше Шығыс Қазақстан облысының әкімі Даниал Ахметов «темекі шеккені үшін» тізімнен шығарылған тыл еңбеккері Хауа Бұланбаеваны жеке құттықтады.

Жеңіс күні қарсаңында өңір  басшысы Даниал Ахметов Өскемен мен Семейдің бірнеше ардагерлері мен тыл еңбеккерлеріне арнайы барды. Олардың арасында 99 жастағы Хауа Бұланбаева да бар.

Еске салсақ, 4 мамырда ардагердің немересі Марат Нұрмұхамбетов «егде жаста темекі шегетіні үшін» әжесінің тізімнен шығарып тастағанын Instagram желісінде хабарлаған болатын.

https://kaz.orda.kz/ardagerler-ke-esi-100-zhasta-y-tyl-e-bekkerin-tizimnen-za-syz-shy-ardy/

Оқиға қоғамда алаңдаушылық тудырып, аймақ әкімі Даниал Ахметовтың жеке араласуына тура келді. Ол 99 жастағы тыл ардегеріне жеке өзі баруға уәде беріп, «Ардагерлер ұйымы»   басшысына сөгіс жариялаған болатын.

Әкім уәдесінде тұрып, тыл ардагерін тізімге қостырды. Ол Хауа Бұланбаевадан басқа, бірнеше ардагерлер мен тыл еңбеккерлерінің үйіне арнайы  қонаққа барды. Олардың әрқайсысына гүл шоқтары, жеміс себеттері, шайға тәттілер, тоңазытқыш және кір жуғыш машиналар, әскери заттар мен ақшалай сыйлықтар берілді.