«Техастағы су тасқыны»: 82 адамның денесі табылды

Техастағы су тасқынынан кем дегенде 82 адам қаза тапты. Жергілікті биліктің мәліметінше, қырықтан аса жоғалған адамдарды іздеу жұмыстары жалғасуда, деп хабарлайды Orda.kz.

Гвадалупе өзенінің жанындағы жазғы лагерьде болған 27 адамның денесі табылды. Қаза тапқандардың арасында лагерь директоры Дик Истленд те бар.

4 шілде күні Гвадалупе өзені арнасынан асып, су Керр округіне және басқа аудандарға жетті. Су деңгейі небәрі 45 минутта сегіз метрге көтерілді. Округтің өзінде кем дегенде 68 адам қайтыс болды. Оның 28-і бала және 40 ересек адам. Соңғы мәліметтер бойынша, көршілес Кендалл округінде екі адам қаза тапқан. Трависте – алты адам, Бернетте– төрт адам, Уильямсон және Том Грин округтерінде бір адамнан қаза тапты.

Полиция мәйіттерді анықтау үшін қаза тапқандардың отбасы мүшелерінен ДНҚ үлгілерін жинауда. Техас губернаторы Грег Эбботт тұрғындарға қауіп сейілмегенін айтып, ескерту жасады.

Айта кетейік, кеше, 6 шілде күні Қазақстан президенті Қасым-Жомарт Тоқаев АҚШ президенті Дональд Трампқа Техас штатында болған жойқын су тасқынына байланысты көңіл айту жеделхатын жолдады.