Тәуелсіз «Орда» сайтының бас редакторы 2 айға үй қамаққа қамалды

1 желтоқсан кешінде сот «Орда» сайтының бас редакторы Гүлнәр Бажкенованы екі айға үй қамаққа алу туралы қаулы шығарды. Бұл жөнінде оның адвокаты Мұрат Адам хабарлады.

Бүгін редакцияның Алматы мен Астанадағы кеңселерінде, сондай-ақ бас редактордың үйінде тінту жүргізілді. Құқық қорғау өкілдері редакция адвокаттарын ғимаратқа кіргізбей қойды.

Күндіз полиция «Орданың» шеф-редакторын, алматылық редакцияның шеф-редакторын, шығарушы редакторды және есепшіні тергеуге алып кетті. Қызметкерлердің телефондарын тәркіледі.

Алматыдағы кеңседе бас редактордың кабинетіндегі сейфті бұзып ашты. Құзырлы органдар редакция қызметкерлеріне берілуі тиіс жалақы қорын түгелдей алып кетті.

Полиция департаменті жалған ақпарат тарату фактілері бойынша қылмыстық іс қозғалғанын мәлімдеді.

Редакция төңірегіндегі жағдай ушығып тұрған кезде сөз бостандығын қорғаумен айналысатын халықаралық «Әділ сөз» қоры ашық мәлімдеме жасады.

Айта кетейік, бүгін қарулы күштер қаулы көрсетпестен, қорғаушыларды кіргізбей, журналис­терді бес сағаттан астам уақыт бойы кеңседе қамап ұстады. 

Бұған дейін саяси мақалалар жариялағаннан кейін «Орда» редакциясына түрлі қысым көрсетіліп, шабуыл жасалғанын айта кетейік. Біздің қызметкерлеріміз тұратын жерге бейтаныс адамдар келіп, өздерін полиция қызметкері ретінде таныстырып, көршілерден сұрақ-жауап алып, жасанды суреттер көрсетіп, журналистің іздеуде жүргенін айтып кеткен жағдайлар да тіркелді. Тіпті «Orda» редакциясының Instagram және Facebook-тағы парақшалары тағы да бұғатталған кездер де болды. Сонымен қатар бас редакторымыз басылымды қалай тартып алмақ болғандары жайлы ашық айтып берген еді. 

Айта кетейік, құқық қорғаушы Галым Агелеуов «Дождь» телеарнасында Orda.kz жайлы сөз сөйледі. Ол Қазақстанда журналистерге еркіндік жоқ екенін атап өтіп, Гүлнәр Бажкеноваға ашылған істер —  саяси тапсырыс екенін ашық айтты. Оның сөзінше, Қылмыстық кодекстің 274-бабы («Көрінеу жалған ақпарат тарату») мен 174-бабы («Араздық қоздыру») Қазақстанда тәуелсіз журналистер мен блогерлерге қысым көрсету құралына айналған. Ол бұл істерді марқұм Айдос Садықов пен Мұрат Нұртілеуге қатысты Orda.kz жасаған материалдармен байланыстырды.