«Тәуелділік тәуекелі»: Ресей салған алғашқы АЭС-ке Қазақстан жалғыз иелік ете ала ма?

Қазақстан өзінің алғашқы атом электр станциясының (АЭС) тек иесі ғана емес, сонымен қатар операторы, уран шикізатының өндірушісі әрі болашақ станцияның барлық технологиялық процестерінің толыққанды иесі болады. Бұл туралы ҚР Атом энергетикасы агенттігінің төрағасы Алмасадам Сәтқалиев мәлімдеді, деп хабарлайды Orda.kz.

Оның айтуынша, конкурс өткізу барысында негізгі талаптардың бірі – атом электр станциясының қазақстандық мамандар есебінен тәуелсіз әрі тиімді жұмыс істеуін қамтамасыз ету болған. Осы мақсатта кадр даярлау жүйесін, өндірістік-техникалық базаны құру және барлық құрылыс кезеңдерін барынша жергілікті болғаны көзделген.

«Біз бұл – Қазақстан экономикасына ірі инвестиция салу екенін жақсы түсінеміз. Толық жауапкершілікпен айта аламын: атом технологиялары бойынша Ресейге тәуелділік тәуекелі азғантай, тіпті жоқ деуге болады. Мұның бәрі келісімшартта нақты бекітілген», — деді Сәтқалиев. 

Оның айтуынша, ынтымақтастық формуласы өте қарапайым: «Келді, салды, үйретті – кетті».

Сонымен қатар Қазақстанда жылу бөлетін құрастырмалар (ТВС) өндірісі ұйымдастырылады. Елде уранның мол қоры бар және қазірдің өзінде отын таблеткаларын шығара бастады. Бұдан бөлек, Қазақстанда уранды конверсиялауға арналған канадалық компаниялардың лицензиясы бар және ресейлік, қытайлық серіктестермен бірлескен жобалар жүзеге асырылуда.

Бұл жобаны іске асыру Қазақстанда шикізат өндіруден бастап отын өндірісіне дейінгі барлық бағыт бойынша толыққанды атом кластерін құруға мүмкіндік береді. Бұл – Мемлекет басшысының тапсырмасына сәйкес келеді және атом электр станцияларын салу мен уран өнеркәсібін дамытудағы басты міндеттердің бірі болады.

Естеріңізге сала кетейік, Қазақстандағы алғашқы АЭС-ті «Росатом» салатын болды. Тілшілеріміз «Неліктен Қазақстандағы алғашқы АЭС-ті Ресей салады?» деген сұраққа жауап іздеп, сарапшылар пікірін білді, ол туралы мына жерден оқи аласыздар.