«Tarlan Astana» болып өзгертілген LRT–да өрт шықты

Астанадағы Сығанақ көшесінде, «Бәйтерек» пен «Сығанақ» станцияларының аралығында орналасқан LRT желісінде өрт болды, деп хабарлайды Orda.kz.

Астанада LRT желісінің құрылыс нысандарының бірінде өрт шықты. Оқиға Есіл ауданындағы Сығанақ көшесінде, «Бәйтерек» және «Сығанақ» станцияларының арасында сағат 13:31 шамасында болған. 

Төтенше жағдайлар министрлігінің мәліметінше, алдымен LRT мамандары электр желісін толықтай кернеуден ажыратқан. Осыдан кейін ғана құтқарушылар өртті сөндіру жұмыстарына кіріскен.

Өртті ауыздықтау кезінде мамандар Vario Carbon автономды арқа құрылғысын пайдаланған. Жалын шарпыған аумақ шамамен 1 шаршы метрді құрады. Қазіргі уақытта өрт толықтай сөндірілді.

Ведомствоның мәліметінше, оқиғадан ешкім зардап шеккен жоқ. Өрттің шығу себебі анықталып жатыр.

Еске салайық, жуырда Астана әкімі Жеңіс Қасымбектің қаулысымен елордадағы Astana LRT жобасының ресми атауы «Tarlan Astana» болып өзгертілген болатын.

Оқи отырыңыз:

Астанада LRT-мен жол жүру құны белгілі болды

Президент Astana LRT жұмысын іске қосты