Тарихи жеңіс: Қазақстан Grand Slam турнирінде үздік үштікке енді

Әлемдік турнир қорытындысы бойынша 36 елден келген 295 татами шебері қатысқан жарыста Қазақстан құрамасы жалпы медальдық есепте үшінші орын алды, деп хабарлайды Orda.kz.       

Жалғас Қайролла 81 келіге дейінгі салмақ дәрежесінде турнир чемпионы атанды, 100 келіге дейінгі санатта алтын медальды Марат Байқамыров жеңіп алды. Осылайша олар Қазақстан қоржынына екі алтын жүлде салды.

Күміс жүлдегерлер қатарында 60 келіге дейінгі салмақта Талғат Орынбасар,  78 келіден жоғары санатта Камила Берлікаш бар.

Қола медальдарды Шерзод Давлатов (60 келіге дейін), Аңсарбек Ғайнуллин (73 келіге дейін), Айдар Арапов (90 келіге дейін) және Аида Тойшыбекова (78 келіден жоғары) иеленді.

Қазақстан бұл беделді турнирді қатарынан төртінші жыл қабылдап, әлемдік дзюдо қауымдастығы алдында ұйымдастыру деңгейінің жоғары екенін тағы бір мәрте дәлелдеді. Жарысқа Олимпиада чемпиондары, әлем чемпиондары, сондай-ақ Grand Slam және Masters серияларының жүлдегерлері қатысты.

Турнирдің алғашқы күні финалдық белдесулерді мемлекет басшысы тамашалады. Сондай-ақ жарыстың жарқын сәттерінің бірі Олимпиада чемпионы Елдос Сметов қатысқан «Golden Fight» кездесуі болды.

Оқи отырыңыз:

• Спортшыларымыз алғашқы тоқсанда елге 200 медаль әкелді
• «Әскер барысы – 2026» турнирінің жеңімпазы анықталды
• Парижге жаяу барған 76 жастағы қария «Құрметті спорт қызметкері» атағын алды