Таразда мәслихат депутатының не үшін соққыға жығылғаны белгілі болды

Кеше, 13 сәуір күні Тараз қаласында Алматы облысы мәслихатының депутаты соққыға жығылды. Депутаттың мейрамханадағы қонақтардың бірімен жанжалдасқаны белгілі болды, деп хабарлайды Orda.kz.

Айта кетейік, Таразда белгісіз адам депутат әрі заңгер Нұрлан Байғазиевті кастетпен ұрып, жақ сүйегін сындырған еді. Екі ер адамның қақтығысы бейнеге түсіп қалған. Бейнеде ашулы ер адам депутатты елдің көзінше ұрып-соққанын көруге болады. Жанжалға телефон қуаттағыш себеп болған. Депутат ерлі-зайыптылар отырған үстелге жақын жерде телефонын қуаттап алмақшы болады. Алайда оның іс-әрекеті әйелге ұнамай, балағат сөздер айтқан. Кейін сақалды ер адам да депутатқа оқталып, ерегісе жөнеледі. Депутаттың сөзін көтере алмаған ер адам меймандардың көзінше депутатты ұра жөнелген.

Жамбыл облысы полиция департаментінің мәліметінше, Нұрлан Байғазиев ауруханаға жатудан бас тартты. Күдікті ұсталды.

Жәбірленуші Нұрлан Байғазиевтің айтуынша, ер адам оны ұрғанымен қоймай, басы мен денесін тепкілеген. Оқиға орнына полицейлер келіп, бәрі полиция бөлімшесіне барады. Сол жерде депутат өзін нашар сезініп, аруханаға жеткізілген. Ал күдікті босатылған. Ауруханада жүргенде Байғазиев полицейлерді қайта шақырады. Алайда олар 3-4 сағаттан кейін бірақ келген. Сонымен қатар ауруханаға депутатты ұрған ер адам достарымен бірге келіп, Байғазиевті қорқытқан. Ер адамның үстінен қылмыстық іс қозғалды. 

Депутат алған жарақатын Алматыда емдемек болып, Жамбылдағы ауруханаға жатудан бас тартты.

Еске салайық, Жамбылда 68 жастағы ер адам немересін зорлады деген күдікке ілінді.