Таразда белгісіз адам депутатты кастетпен ұрып, жақ сүйегін сындырды

Таразда Алматы облысының депутатын белгісіз адам бетінен кастетпен ұрып, жақ сүйектерін сындырғаны белгілі болды, деп хабарлайды Orda.kz.

Оқиға 13 мамыр күні кешкі уақытта Жамбыл облыстық ПД ғимаратының жанында орналасқан «Ғибрат» кафесінде болды

Депутат әрі заңгер Нұрлан Байғазиев жақ сүйектері сынып, ауруханаға жеткізілді. Қазіргі уақытта ол ауруханада отаға дайындалып жатыр.

«Аталған факті бойынша Қазақстан Республикасы Қылмыстық кодексінің 293-бабының 1-бөлігі (Бұзақылық) бойынша сотқа дейінгі тергеу жүргізілуде. Оқиғаға қатысы бар адам анықталып, полицияға жеткізілді. Жәбірленушіге медициналық көмек көрсетілді, алайда ол ауруханаға жатудан бас тартты. Қазіргі уақытта қылмыстық іс бойынша оқиғаның барлық мән-жайын жан-жақты әрі объективті анықтауға бағытталған қажетті тергеу және жедел-іздестіру шаралары жүргізілуде», – деп хабарлады Жамбыл облысы полиция департаментінің баспасөз қызметі.

Telegram-арнаның мәліметінше, Байғазиев Таразға іссапармен келген және заңгер ретінде клиенттермен кездесулер өткізіп жүрген. Сол сәтте оған белгісіз біреу шабуыл жасап, кастетпен ұрған көрінеді.