Танымал адвокат Шерзаттың сотындағы прокурорлардың өрескел қателіктерін көрсетті

Адвокат Жохар Өтебеков Шерзаттың сотында отырған прокурорлардың ақылға қонымсыз, өрескел қателіктерін жазды, деп хабарлайды Orda.kz.

Бұл мәселені Өтебеков өзінің Facebook парақшасына жариялады. Сотта оқиға күні Шынасыл Шерзатты 00:42 пышақтаса, Нұрқанатты 01:04-те пышақтаған деп мәлімдеген болатын.

«Естеріңнен алжастыңдар ма? Шерзат сонда пышақ ұстаған адаммен 20 минут бойы төбелесті ме? Ол дүкеннен қашып шығып, сол жерде-ақ құлап түсті, ал әрі қарай оны жабылып ұрған (ол барлығына мәлім болған бейнежазбада да ашық көрсетілген)» деп жазды адвокат. 

Сондай-ақ адвокаттың пайымдауынша, егер Нұрқанатты 01:04-те пышақтаса, онда Шерзатты 01:02-де пышақтады. Ал 00:42-де қылмыскерлер енді дүкенге келген.

«Неліктен тергеу жүргізді? Уақытты анықтау үшін. Олардың қолында бірнеше бейне материал бар емес пе? Сонда олар қалай болса, солай бұл істі зерттей салды ма?» деп жазды адвокат. 

Еске сала кетейік, тілшіміз Шерзат ісінде «Чика» лақап атымен танымал болған азаматтан сұхбат алған болатын.