Талғардағы атышулы іс бойынша учаскелік инспекторға үкім шықты

Қызылқайраттағы қанды оқиғаға нүкте қойылғанымен осы іске қатысты құқық қорғау органдары қызметкерлеріне қатысты іс әлі де жалғасуда. Инспектор 2 жыл 4 айға бас бостандығынан айырылды, деп  хабарлайды Orda.kz.

Ол ҚК 371-баптың 2-бөлігі  «Ауыр зардаптарға әкеп соққан салғырттық» пен 369-баптың 2-1-бөлігі  «Құқық қорғау органы қызметкері жасаған қызметтік жалғандық» бойынша сотталды. Сот шешімімен айыпталушыға 2 жыл 4 ай бас бостандығынан айыру жазасы тағайындалып, жазаны орташа қауіпсіздік мекемесінде өтеу белгіленді.

Сонымен қатар, ол өмір бойына мемлекеттік қызметте жұмыс істеу құқығынан және лейтенант арнайы шенінен айырылды. Сот жәбірленушінің моральдық зиянды өтеу туралы талабын қанағаттандырып, 3 миллион теңге өндіруді міндеттеді. Үкім әлі заңды күшіне енген жоқ, тараптар оны апелляциялық тәртіппен қайта қарауға құқылы.

Айта кетейік, 2025 жылғы 3 қыркүйекте, қайғылы оқиғадан үш күн бұрын, учаскелік инспектор жәбірленушінің шақыруымен оның үйіне барған. Сол күні әйелдің үйіне мылтық ұстаған ер адам келген. Әйелдің айтуынша, ол бұған дейін өзін зорлап, қыр соңынан қалмағанын айтқан екен.

Инспектор қорғау нұсқамасын рәсімдегенімен, жәбірленушінің қолын қолдан жасаған. Бұл деректі сараптама қорытындысы мен оның соттағы мойындауы растады.

Кейін 6 қыркүйекте сол ер адам әйелдің ағасын атып өлтіріп, екі кәмелетке толмаған сыбайласымен бірге оның екі жасар қызын ұрлап кеткен. Арнайы жасақ баланы босатып, анасына тапсырды, ал күдікті ұсталды. Ал 18 наурызда сот негізгі айыпталушыны 25 жылға, ал екі жасөспірімді 9 жылға бас бостандығынан айырды.

Оқи отырыңыз: 

• Жыры бітпеген Талғар полициясы: Қызды зорлаған күдіктіні босатып жіберіп, ағасын атып өлтірді
• Талғардағы кісі өлтіру мен бала ұрлау қылмысы: Басты айыпталушы 25 жылға сотталды
• Талғардағы қанды қылмыс: Күдіктінің анасы ұлын қылмысқа не итермелегенін айтты