Талғардағы кісі өлтіру мен бала ұрлау қылмысы: Басты айыпталушы 25 жылға сотталды

Алматы облысының мамандандырылған ауданаралық қылмыстық істер жөніндегі сотында ел жағасын ұстатқан іс бойынша үш айыпталушыға үкім шығарылды. Бүгін сот басты айыпталушыны 25 жылға бас бостандығынан айырды, деп хабарлайды Orda.kz. 

Қанды оқиға былтыр 6 қыркүйекте Талғар ауданы Қызылқайрат ауылында болған. Жергілікті көлік жөндеу станциясы қызметкері ауыл тұрғынын зорлап, бір ай бойы оны бопсалап, жалаңаш фотоларын жәбірленушінің әріптестеріне таратқан. Кейін ол әйелдің ағасын көшенің қақ ортасында жүрек тұсынан атып, оның екі жасар қызын ұрлап кеткен. Көп ұзамай кішкентай қыз табылды. 

Жәбірленуші тараптың адвокаттарының айтуынша, істің басты фигуранты 25 жылға бас бостандығынан айырылды. Ал кәмелетке толмаған екі сыбайласы 9 жылға сотталды. 

Басты айыпталушы марқұмның анасына, жұбайына және қарындасына 10 миллион теңгеден – барлығы 30 миллион теңге беруге міндеттелді. Кәмелетке толмаған сыбайластарының әрқайсынан үш жәбірленушінің пайдасына 5 миллион теңгеден – әрбір сотталушыдан 15 миллион теңгеден өндіріледі.

Айта кетерлігі, 3 қыркүйекте, трагедиядан үш күн бұрын, учаскелік инспектор сол үйдегі әйел шақырған соң барады. Сол күні үйге мылтық ұстаған ер адам келген. Инспектор қорғау нұсқамасын рәсімдеп, оған жәбірленушінің жалған қолтаңбасын қойған. Сараптама бұл қолтаңбаның жәбірленушіге тиесілі емес екенін анықтады. Артынша прокуратура Талғар аудандық полициясының қызметкерлеріне қатысты «лауазымды тұлғалардың әрекетсіздігі» бабы бойынша қылмыстық іс қозғады. 

Оқи отырыңыз:

• Талғардағы қанды қылмыс: Күдіктінің анасы ұлын қылмысқа не итермелегенін айтты
• ҚазТАГ басылымының басшысы Әсет Матаев ұсталды
• Израиль президенті Ицхак Герцог Тоқаевтың бейбітшілік қажет деген пікірін қолдайды