Талдықорғанның бұрынғы әкімі жаңа қызметке тағайындалды

Талдықорған қаласының бұрынғы әкімі Әсет Масабаев Алматы облысы әкімінің орынбасары болды, деп хабарлайды Orda.kz.

Бұл туралы Алматы облысы әкімдігінің баспасөз қызметі мәлімдеді. 

Былтыр мамыр айының басында Әсет Масабаев инсультпен жансақтау бөліміне түскен. Оның денсаулығының қалпына келуіне бір айға жуық уақыт кетті. Ол кетеріне екі апта қалғанда жұмысқа қайта кірісті. Кейін 30 маусымда оның отставкаға кеткені белгілі болды.

Әсет Дүйсебекұлы 1985 жылы туған, білімі жоғары. 2008 жылы Алматы энергетика және байланыс институтын «Электрэнергетикалық жүйелер және тораптар» мамандығы бойынша, 2014 жылы Экономика және құқық академиясын «Қаржы» мамандығы, Ресей халықтар достығы университетін «Құқықтану» мамандығы бойынша бітірген.

Еңбек жолын 2007 жылы «Алматы электр станциялары» Алматы қаласы энергетика және коммуналдық шаруашылық басқармасының жетекші маманы, бөлім басшысы, Алматы қаласы Жетісу және Медеу ауданы әкімдерінің орынбасары, Алматы қаласы әкімі аппаратының бас инспекторы, Алматы қаласы табиғи ресурстар және табиғат пайдалануды реттеу басқармасының басшысы, Алматы қаласы энергия тиімділігі және инфрақұрылымдық даму басқармасы басшысының орынбасары, басқарма басшысы, Алматы қаласы Медеу ауданының әкімі, Жетісу облысы Талдықорған қаласының әкімі қызметтерін атқарған.

2024 жылғы 16 тамызынан бастап бүгінгі күнге дейін ULKEN GROUP LTD жеке компаниясының басқарушы директоры болған.