Талдықорғанда сарбаздың қазасына байланысты батальон командирінің орынбасары сотталды

Алматы гарнизонының әскери соты мерзімді әскери қызметтегі сарбаздың қазасына әкеп соққан салғырттығы үшін батальон командирі орынбасарын төрт жылға бас бостандығынан айырды. Қайғылы оқиға Талдықорған гарнизонындағы әскери бөлімдердің бірінде болғанын Orda.kz хабарлайды.

2025 жылғы 23 қыркүйекте қаруды тазалау кезінде пулеметтен абайсызда оқ атылған. Салдарынан қатардағы жауынгер А.Сейітқали жарақат алып, көз жұмған.

Тергеу барысында батальон командирінің орынбасары алдыңғы күні өткен атыс жаттығуларынан кейін қаруды толық тексермегені анықталды. Соның салдарынан пулемет ұңғысында бір оқ қалып қойған. Дәл осы оқ әскери қызметшінің қазасына себеп болған.

Офицер Қылмыстық кодекстің 453-бабының 2-бөлігі бойынша — ауыр зардаптарға әкеп соққан қызметке салғырт қарау фактісімен кінәлі деп танылды.

Үкім әзірге заңды күшіне енген жоқ.

Оқи отырыңыз: 

• Сынған қабырғалары өкпесін тесіп өткен: 10 жасар бала кернеуі 6000 вольттық токқа түсті
• Алматыдағы Hilton қонақүйі жабылды: 170 қызметкер бір күнде жұмыссыз қалды