Тағы да Талғар: Бір топ ер адам жігітті есінен танғанша сабады

Талғар ауданындағы ер адамды жабылып соққыға жыққан бір топ жігіттің бейнежазбасы желіні шулатты, деп хабарлайды Orda.kz.

Желіде Талғар ауданында бір топ ер адам жабылып, бір адамды тепкілеп жатқаны көрінетін бейнажазба тарады.

«Талғар ауданындағы «Нұрия» тұрғын үй кешені. Бір топ адам жігітті есінен танғанша ұрып-соқты. Оның бет-аузы қан-жоса болып, әрең тұрып кетті. Ал бұзақылардың бірі терезеден бейнежазбаға түсіріп тұрғандарға боқтық сөздер айтып, қорқытып, оның бұған лайық екенін айқайлап айтты» деп жазды Сырым Итқұлов. 

Алматы облыстық полиция департаментінің баспасөз қызметі хабарлағандай бұл факті бойынша қылмыстық іс қозғалды. Оқиғаның 27 сәуір күні таңертең Бесағаш ауылындағы «Нұрия» тұрғын үй кешенінің аумағында болғаны анықталды. Тәртіп бұзушылық әлеуметтік желілерге мониторинг жүргізу барысында анықталғаны аталды.

«Көше төбелесіне қатысқан барлық тұлғаларды анықтау және ұстау шаралары жүріп жатыр. Барлық қатысушылар, ешқандай ерекшеліксіз, ұсталып, қолданыстағы заңнамаға сәйкес қатаң жауапкершілікке тартылады. Полиция кез келген агрессия мен қоғамдық тәртіпті бұзу әрекеттері дереу және қатаң түрде тоқтатылатынын ескертеді»,  деп мәлімдеді құқық қорғау органдары.

Еске сала кетейік, кеше 28 сәуір Болат Назарбаевтың қолшоқпары Айбек Қоспаевтың сотында тараптар арасында жарыссөз болды.