«Тағы да әскер, тағы да сарбаз»: Түркістан облысында сарбаз өз-өзін атып өлтірмекші болды

Түркістан облысы, Арыс гарнизонында келісімшарт бойынша әскери қызметте болған сарбаз өз-өзіне қол жұмсамақ болды, деп хабарлайды Orda.kz.

Шымкент гарнизонының баспасөз қызметінің мәліметінше, оқиға 16 қыркүйекте болды.

«Арыс гарнизоны әскери бөлімдерінің бірінде келісім-шарт бойынша әскери қызметте кезекшілік міндетін атқару кезінде басынан травматикалық қарудан жарақат алды. Алдын ала мәлімет бойынша, сарбаз жанұясындағы кикілжің салдарынан өз-өзіне қол жұмсамақ болған» делінген баспасөз хабарламасында.

Сарбаз жергілікті ауруханаға жеткізіліп, оған медициналық көмек көрсетілді. Қазіргі таңда, жағдайы тұрақты ауыр деп бағалануда, өміріне қауіп жоқ. Құқық қорғау органдары оқиғаға қатысты қылмыстық іс қозғап, тергеу амалдарын жүргізуде.

Айта кетейік, жалпы елімізде әскердің айналасындағы мәселе ушығып тұр. Соңғы айлардағы әскерде жарақтанған, өз-өзіне қол жұмсаған, басқа да әлімжеттіке ұшыраған оқиғаларға тоқталайық. Жезқазғанда рота командирі оқу-жаттығу полигонында жарақат алды.

Алматының Түріксіб ауданында, құрлық әскерлерінің әскери институты аумағында 44 жастағы сержанттың өлі денесі табылды. Ақтау гарнизонының 25744 әскери бөліміне мерзімді әскери қызметін өтеуге жалғыз ұлын жіберген отбасына баланың мүрдесі қайтты. Осы сынды елімізде резонанс болған Мұхтар Ербаянның ісінен бөлек тағы да басқа оқиғалар соңғы екі айдың өзінде тоқтамай тұр.

 Әскерге қатысты мәселенің ушыққаны соншалықты ел бойынша міндетті әскери қызметті жою бойынша петицияны  қолдайтындардың қатары көбейіп жатыр.