Төсекте шылым шеккен зейнеткер отқа оранды

26 желтоқсан күні сағат 09:14-те Қостанай облысының Сарыкөл ауданында өрт шықты. Аудан орталығынан 8 шақырым жерде орналасқан Островной ауылының тұрғындары № 23 өрт сөндіру бекетіне қоңырау шалған. Оқиға орнында жеке екі пәтерлі үйдің шатыры жанып жатқаны анықталды.

Өртті сөндіру үшін Сарыкөл ауылының №23 өрт сөндіру бекеті жеке құрамынан 9 адам және екі автоцистерна қажет болды. Өрт сөндіруге «Урицк орман шаруашылығы басқармасы» КММ еріктілері де қатысты.

Өрт сөндірушілер оқиға орнына жеткенше, жалын тек төбені ғана емес, сонымен қатар үйдің қамыстан тұрғызылған қабырғаларына да тарап кеткен. Сағат 11:01-де 100 шаршы метр аумақты құраған өрт сөндірілгеннен кейін үйдің іші тексерілді. Нәтижесінде, қираған бөлмелердің бірінде 64 жастағы зейнеткер ер адамның күйік шалған денесі табылды.

Өрттің себебі - төсекте шылым шегу болған.