Судьяға жедел жәрдем шақырылды: 30 млн бопсалаған блогерлердің үкімі кейінге қалды

14 қазан күні Алматы қаласының қылмыстық істер жөніндегі ауданаралық сотында кәсіпкерден 30,5 миллион теңге бопсалады деп айыпталған блогерлерге қатысты сот үкімі шығу керек еді.

Orda.kz журналистері күні бойы сот ғимаратының табалдырығын тоздырса да, үкімді біле алмады.

13 қазан күні Алматы қаласының қылмыстық істер жөніндегі сотында блогер әрі қоғам белсенділері: Дамир Кушеев пен Руслан Каримовқа қатысты сот процесінің жарыссөз кезеңі аяқталды. Олар кәсіпкер Бахтияр Блаевтан 30,5 миллион теңге бопсалады деп айыпталып отыр. Айыпталушылар қатарында кәсіпкерлер Андрей Белянский мен Құрманғазы Айтмұханов та бар.

Сот үкімі 14 қазан сағат 10:00-ге белгіленсе де, 11:30-да басталды. Бұл осы ғимаратта қатар өтіп жатқан «Дикий Арман» ісі бойынша апелляциялық отырыспен байланысты болса керек.

Отырыс бастала сала судья Бәкірбаев алқабилерге қойылатын сұрақтарды оқып шығып, алқабилермен бірге кеңесу бөлмесіне кетті. 

Сот хатшысы бұл рәсім кемінде жарты сағатқа, көбіне екі сағатқа дейін созылатынын ескертті. Алайда жарты сағаттан кейін де, екі сағаттан кейін де үкім жайлы хабар болмады. Кейін сот түскі үзіліске кетті. Сағат 14:30 шамасында адамдар қайтадан залға жиналды.

Күтуден шаршаған жұрт түрлі жорамалдар айта бастады. Бірі мұны алқабилерге қысым жасалып жатыр деп түсінсе, енді бірі: «ақтап қалады-ау» деп үміттенді. 

Шамамен 16:00-де қолдары артына қайырылып, кісенделген айыпталушылар залға кірді. 

«Өз-өзіне қол жұмсамасын деп кісен салды», — деп қалжыңдады Дамир Кушеев.

Содан кейін байыппен:

«Алқабилер қызу талқылап жатқан сияқты, жедел жәрдем шақырыпты», — деді.

Бірақ дәрігерлер алқабилерге емес, судьяға шақырылған болып шықты. Шамамен жарты сағаттан соң залға сот хатшысы кіріп:

«Құрметті қатысушылар, кешірім сұраймыз. Судьяның жағдайы күрт нашарлап, жедел жәрдем шақырылды. Үкім ертең сағат 12:00-ге шегерілді», —деп хабарлады.

Зал ішінде абыр-сабыр күшейіп, процеске қатысушылар наразылықтарын білдіре бастады.

Осылайша, 14 қазан күні журналистер мен қатысушылар сот ғимаратында бір күн күткенмен, шешімді ести алмады. Сот отырысы 15 қазанда жалғасады.

Айта кетейік, бүгінгі сот отырысын жүргізген — әлеуметтік желілерде «танымал» болып үлгерген судья Бақытхан Бәкірбаев. Көпшілік оны желіде тараған бейнероликтен таниды. Онда судья сот отырысы кезінде саусақтарымен торға ұқсайтын ишара көрсеткен еді. Жұрт оның бұл әрекетін қызу талқылаған еді.