«Сөз бостандығына кереғар»: Сот Азаттыққа аккредитация бермеген СІМ-нің шешімін заңды деп тапты

20 тамызда Астана әкімшілік соты Азат Еуропа/Азаттық радиосы – Қазақстан өкілдігінің (RFE/RL-Қазақстан) Қазақстанның сыртқы істер министрлігіне қарсы берген әкімшілік талап арызын қанағаттандырмады. Судья Смағұлов министрліктің Азаттық тілшілеріне аккредитация бермеу туралы шешімін заңды деп тапты, деп хабарлайды Orda.kz.

Бұған дейін Азат Еуропа/Азаттық радиосы - Қазақстан өкілдігі (RFE/RL-Қазақстан) сотқа арызданып, Азаттықтың аккредитация бермеген немесе аккредитация мерзімін ұзартпаған Қазақстан СІМ-нің шешімін заңсыз деп танып, күшін жоюды сұраған еді.

«Шешімді апелляцияға береміз. Сот сыртқы істер министрлігі келтірген дәйектерді қабылдады. Біздің алға тартқан уәждерімізді қабылдамады», — деді сотта Азаттықтың мүддесін қорғаған адвокат Лилия Чаусова.  

Бүгінгі шыққан шешім Азаттықтың 7 тілшісіне қатысты. Алдағы уақытта 9 тілшінің аккредитациясына байланысты сот өтпек. 

Қазақстан сыртқы істер министрлігі бұған дейін жіберген жауабында «Азаттық қызметкерлері тиісті аккредиттеусіз жұмыс істеді» деп айыптаған еді. Бірақ Азаттық мұнымен келіспеген. Азаттық Қазақстан заңы талаптарын орындай отырып, аккредиттеу туралы өтінішті алдыңғы мерзім аяқталардан екі ай бұрын, яғни уақтылы бергенін, бірақ министрлік нақты себебін айтпастан, өтінішті қарау мерзімін тағы екі айға ұзартқанын айтқан еді.

Азат Еуропа/Азаттық радиосының президенті Стивен Капус Астана сотының шешімі Қазақстан Конституциясына қайшы деп мәлімдеді.

«Бұл шешім сөз бостандығына кепілдік беретін Қазақстан Конституциясына кереғар. Азат Еуропа/Азаттық радиосы Қазақстан халқы жоғары бағалайтын өте маңызды қоғамдық қызмет атқарып отыр. Журналистика – қылмыс емес және журналистеріміз жұмыс істегені үшін жазаланбауы керек. Жалпы алғанда осы маңызды мәселені ашығырақ әрі бірігіп шешуді қолдаймыз», — деді Стивен Капус. 

Бүгін Астана соты Азаттық тілшілеріне аккредитация бермеген сыртқы істер министрлігінің шешімін құптап, Азаттықтың өтінішін орындамады. Азаттық шешімді апелляцияға беретінін мәлімдеді. 

Бұған дейін халықаралық баспасөз қорғау ұйымдары Қазақстан билігін Азаттық тілшілеріне аккредитация беріп, еркін жұмыс істеуіне мүмкіндік беруге үндеген. 

Халықаралық журналистер федерациясы (International Federation of Journalists – IFJ), Human Rights Watch (HRW) құқық қорғау ұйымы Қазақстан сыртқы істер министрлігінің Азаттықтың 16 журналисіне аккредитация бермеуін сөз бостандығына жасалған шабуылға теңеп, Қазақстан билігін еркін баспасөз принциптерін қолдауға үндеген.