Сот «Орда» редакциясының бас редакторын үйқамақтан шығарудан бас тартты

Бүгін Алматы қалалық сотының қылмыстық істер жөніндегі сот алқасы адвокат Мұрат Адамның жеке шағымын қарады. Ол Гүлнәр Бажкенованы үйқамақтан шығаруды сұраған еді. Алайда сот бұрынғы шешімді өз күшінде қалдырды, деп хабарлайды Orda.kz.

Шағым нәтижесі туралы Мұрат Адам Facebook парақшасында жазды. Оның айтуынша, 1 желтоқсанда Гүлнәр Бажкенованы ұстағанда және оған үйқамаққа қамау барысында бірқатар заңбұзушылықтар жіберілген.

«Біз барлық құжатты, дәлелді, уәжді ұсындық. Бірақ апелляциялық сот бір де бір сұрақ қоймады, біз көрсеткен заң бұзушылықтардың ешқайсын тексеруге де тырыспады.
Біздің Фемида меңіреу қара тасқа айналғандай: құлағы да, көзі де, тілі де жоқ. Тыңдағысы келмейді, көргісі келмейді, түсінгісі келмейді. Тіпті Гүлнәр Бажкенованы үйқамақта қалдыру туралы шешімнің себебін де түсіндіру қажет деп таппады. Сонда мұны түсіндіру соншалық қиын ба? Шешім жоғарыдан дайын күйінде түскен сияқты. Артық сөзсіз, түсіндірмесіз, әділдіктің нышаны да жоқ», — деп жазды адвокат. 

Айта кетейік, ҚазТАГ агенттігінің басшыларына қарсы қылмыстық іс қозғалғаны туралы жазғанбыз. Ал 1 желтоқсан күні «Орда» редакциясының бас редакторы Гүлнәр Бажкенованы үйқамаққа қамап, пәтері мен кеңселеріне тінту жүргізілді. Қазіргі жүйенің еркін адамдарды қамап, бұғауда ұстауы жалпы қоғамды қалай құлдырататыны жайлы материалымыздан оқыңыз.