Сот Алматыдағы жол апатына себепкер болған Әнел Сартаеваның жазасын кейінге қалдырды

Алмалы аудандық соты Алматыда болған  атышулы автобус апатына кінәлі Әнел Сартаеваға қатысты үкім шығарды, деп хабарлайды Orda.kz.

Оқиға биыл жазда болған. Orda.kz тілшісі жаңа туған сәбиге анасынан айырылу қалай әсер ететіні жайлы психотерапевт маманнан сұхбат алып және жол апатының себептері жайлы мақала жазған болатын. Ақыры сот сәбидің жағдайын ескеріп, бала 3 жас 9 айға толғанша жазаны кейінге шегерді.

Әнел Сартаева мінген көлік алдынан кесе көлденең шыққан соң, автобус оған қақтығысып тротуарға шығып, дүкенге соғылды. Жол апаты кезінде бір жолаушы оқиға орнында қаза тапты.

Сотта Сартаева өз кінәсін мойындап, түрмеге қамамауды өтінді. Қаза тапқан жолаушының ұлы айыпталушыны кешіріп, оған ешқандай талап қоймады.

Сот үкімімен Сартаева ҚК 345-бабының 3-бөлігімен кінәлі деп танылды және оған 2 жыл 6 ай бас бостандығынан айыру жазасы тағайындалды. Сонымен қатар, 5 жыл көлік жүргізу құқығынан айырылды. Үкімнің орындалуы бала 3 жас 9 айға толғанша кейінге қалдырылды.

Айта кету керек, Әнел Сартаева Salem Social Media медиа-компаниясының продюсері, ол «5:32», «Эскорт», «1286» секілді танымал сериалдарға продюсерлік еткен.