СҚО-да ер адамның мәйіті бірнеше күн бойы төсектің астында жатқан: Әйел 14 жылға сотталды

Солтүстік Қазақстан облысында ер адамның мәйіті бірнеше күн бойы пәтердегі төсектің астында жатқан. Осы уақытта пәтер иесі қалыпты өмірін жалғастырып, жұмысқа барып, адамдармен араласқан. Алайда ол адам өлтіргені үшін жауапкершіліктен құтылмады, деп хабарлайды Orda.kz. 

Qazaqstan Media мәліметінше, айыпталушы Эльмира Шевелёва Қызылжар ауданы Бескөл ауылында бұрыннан белгілі тұлға болған. 53 жастағы әйелдің аты оның ашушаң мінезіне байланысты шыққан. Оның заңмен мәселелері 2009 жылдан басталған. Сол жылы ол адам өлтіргені үшін жеті жарым жылға сотталған. Ал тура 10 жылдан кейін қайтадан ауыр дене жарақатын салғаны үшін төрт жылға колонияға жіберілген. Сол кезде ол үш бөтелке арақ ішіп, танысының әйеліне пышақ сұққан.

Бостандыққа шыққаннан кейін де әйел полицияның мәліметтерінде жиі көрініп, әкімшілік сотқа бірнеше рет түскен. Таныстарын балағаттап, көршілерімен жанжалдасып, қоғамдық тәртіпті бұзған. Айта кетерлігі, ол жазаның түрі ретінде көбіне әкімшілік қамауды өзі сұрайтын болған. Себебі қоғамдық жұмыстарды денсаулығы көтермейді, ал айыппұл төлеуге қаражаты жоқ екенін айтқан.

Қайғылы оқиға биылғы 27 ақпан күні оның пәтерінде болған. Кешкі сағат алты шамасында әйел отын жару үшін сыртқа шықпақ болып, қолына балта ұстаған. Сол кезде оның үйіне шақырылмаған танысы Мехоношин келген. Үй иесінің айтуынша, ол мас күйде болып, кетуден бас тартқан, тіпті түнде қалуға сұранған. Ауызша жанжал тез арада қайғылы жағдайға ұласқан.

«Мен есікті жабу үшін Мехоношинді айналып өттім. Кенет ол арқасымен маған қарай құлай бастады. Қорқыту үшін екі рет балтамен ұрдым. Бірақ соққыны балтаның жалпақ жағымен емес, өткір жүзімен тигізгенімді байқамай қалдым. Соққы желке тұсына тиді. Содан кейін ол етпетінен құлады», — деп сотта айыпталушы түсініктеме берген. 

Оқиғадан кейін әйел жедел жәрдем де, полиция да шақырмаған. Қанды жуып, мәйітті бөлмеге сүйреп кіргізіп, төсектің астына жасырған. Өз сөзінше, ұялы телефонында ақша болмағандықтан, ешкімге хабарлай алмаған.

Бірнеше күн бойы ер адам жоғалғандар қатарында есепте тұрған. Оны туыстары мен полиция іздеген. Ал ауыл тұрғыны бұл уақытта жұмысқа барып жүрген. Көршілерінің айтуынша, ол ыдыс жуатын жерде жұмыс істеген, таныстарымен араласып, әдеттегі өмірін жалғастырған.

1 наурыз күні іздестіру шаралары барысында полиция қызметкерлері Шевелёва жұмыс істейтін жерге барған. Кейін оны үйіне апарған. Пәтерге кірген бойда сасық иіс сезілген. Алғашында иіс жертөледен шығып тұр деп ойлаған.

«Жатын бөлмеге кіргенде диванның астынан мәйіт табылды. Содан кейін Шевелёва болған жағдайды айтып берді», — деді сотта полиция қызметкері. 

Қорғау тарапы қылмыс абайсызда жасалды деп дәлелдеуге тырысқан. Алайда сот бұл нұсқаны қабылдамады. Себебі соққылар адамның өмірлік маңызды бөлігі — басына бағытталған, яғни әрекет әдейі жасалған деп танылды.

Сот үкімімен Эльмира Шевелёва адам өлтіргені үшін кінәлі деп танылып, 14 жылға бас бостандығынан айырылды. Сондай-ақ оның әрекетінде қауіпті қайталанған қылмыс бар екені ескерілді. Жазасын ол қауіпсіздігі жоғары колонияда өтейді. Сонымен қатар онда маскүнемдіктен емделеді. Сот үкімі әзірге заңды күшіне енген жоқ, сотталған тарап оны апелляцияға бере алады.

Оқи отырыңыз:

• Польша Қазақстанның әскери атташесі Әнуар Бәкібайды босатты
• Төсекке байлап қойып, үнемі ұрып-соққан: 26 жастағы ер адам туған қызын өлтірген