СҚО-да алты бірдей әкім қоқыс үйінділері үшін айыппұл төледі

Солтүстік Қазақстан облысында спутниктік бақылау арқылы 62 заңсыз қоқыс үйіндісі анықталып, ауыл әкімдеріне айыппұл салынды. Бұл туралы Orda.kz Петропавловск.news-ке сілтеме жасап хабарлайды.

Анықталған қоқыс орындарының барлығы облыс орталығынан 50 шақырым аумақта орналасқан және спутниктік суреттердің көмегімен табылған. Осыған байланысты жергілікті экология департаменті облыстың 12 ауданына тексеріс жүргізді. Тексеру нәтижесінде алты ауылдық округ бойынша тоғыз материал жолданып, жеті әкімшілік іс қозғалды.

«Әкімшілік жауапкершілікке алты ауылдық округтің әкімі тартылды. Айыппұлдардың жалпы көлемі 206 мың теңге болды», — деп хабарлады СҚО экология департаментінің басшысы. 

Алайда айыппұл салынғанына қарамастан, тұрмыстық қалдықтар мәселесі әлі де шешімін тапқан жоқ.

«Әкімдіктердің мәліметінше, қазіргі таңда облыста тұрмыстық қатты қалдықтарды (ТҚҚ) төгуге арналған 444 нысан бар. Оның 428-іне ғана жер актілері рәсімделген. Ал қызмет көрсетуге небәрі жеті полигон ғана рұқсат алған», — деді облыстық экология департаментінің басшысы. 

Еліміз бойынша да жағдай ұқсас. Қазақстанда шамамен 3 мың қоқыс полигоны бар, алайда олардың тек 20 пайызы ғана белгіленген талаптарға сай келеді.

Тақырыпқа сай оқи отырыңыз:

• Оралда үшінші күн қатарынан қоқыс полигонындағы өртті сөндіріп жатыр
• Ақтау қоқысқа батып қалуы мүмкін: қоқыс полигоны жабық
• «Күніне 130 қалдық төгетін көлік келеді»: Алматы облысында кәріз суы мәселесі ушығып тұр